سون یازیلار

سون گؤروشلر

آرشیو


« آنلاین کؤچورگه | آنا یارپاق | مسیج مکتبی / توپلاییب اینجه له ین : دوکتور حسن – م. جعفرزاده »

ربیعه قدیرین آذربایجان قزئتی ایله دانیشیغی

زومار آیي ۱۴, ۱۳۸۹

ربیعه قدیر اؤز آفیسینده چینده دوستاق اولان اوشاقلاری‌نین شکیلی یانیندا دایانیب. شکیل الشرق الاوسط‌دن آلینیبدیر.

“آذربايجانين ان جدّي مسئله‌سي‌نين داغليق قاراباغ مناقشه‌سي اولدوغوندان دا خبردارام”

عوموم دونيا اويغور کنگره‌سي‌نين پرئزيدئنتي رابيعه قديرين آذربايجان روزنامه‌سي ايله مصاحبه‌سي

- اورومچودا باش وئرميش قانلي اولايلارلا باغلي آذربايجان جامعه‌سينه دئيه بيلرسينيز؟

- ايلک اولاراق، آذربايجانلي قارداشلاريما سلاملاريمي يوللاييرام. ايراندا و دونيانين مختليف يئرلرينده چوخلو سايي‌دا آذربايجانلي‌نين ياشاديغيني بيليرم.

بيليرم کي، ايرانداکي آذربايجانليلارين دا مسئله‌لري وار. آذربايجانين ان جدّي مسئله‌سي‌نين داغليق قاراباغ مناقشه‌سي اولدوغوندان دا خبردارام. من آذربايجان خالقي‌نين بوتون مسئله‌لرينه شریک چيخيرام و سادالاديغيم مسئله‌لرده اليمدن گلن يارديمي گؤسترمه‌يه حاضيرام. چين حوکومتي‌نين اويغورلارا قارشي آپارديغي تعقيب سياستينه قارشي سيزين ده يارديم ائتمه‌گينيزي ايسترديم. بيزيم تورپاقلاريميز- دوغو تورکوستان دونيادا ياشايان بوتون تورکلرين- آذربايجانليلارين، قازاخلارين، تورکمنلرين، قيرغيزلارين و آيريلاري‌نين دا آنا يوردودور. دوغو تورکوستان تورک مدنيتي‌نين بئشيگي دير. بو مدنيت يوخ اولارسا، تورکلر اؤز آنا يوردونو ايتيرميش اولار. اونا گؤره ده ايندي گرک هامي اويغور تورکلرينه صاحیب چيخسين.

- واشينگتون‌دا اويغورلارين دورومونو رسمي دايره‌لره آنلاتماغا موفق اولدونوزمو؟

- بيز دوغو تورکوستاندا باش وئرن حاديثه‌لرين ماهيتيني آچيقلاماق اوچون کنگره‌عضولري و کنگره‌نين چين اوزره ايشچي قروپونون عضولري ايله گؤروشدوک، بعضي ميلت وکيللري ايله مطبوعات کنفرانسي کئچيرديک. لاکين اوباما حوکومتي‌نين يوکسک سويييه‌لي تمثيلچيلري ايله گؤروشمک ايمکانيميز اولمادي. ايندي اونلارين قانلي اولايلارلا باغلي داها سرت موقع توتماسي ايچين چاليشيريق.

- اورومچودا باش وئرميش قانلي حاديثه‌نين کؤکونده نه دايانير؟

- ۱۹۴۹- جو ايلده چين حوکومتي دوغو تورکوستاني ايشغال ائدنده اورادا چينلي‌لرين سايي سي ۳۰۰ مين نفر ايدي. ايندي ايسه بوتون ولايت‌ده اونلارين سايي اويغورلارين سايي ايله برابرلَشيب و ۹ ميليونا ياخيندير. بو، رسمي پئکي نين بيزيم تورپاقلاردا آپارديغي آسسيميلياسييا سيياستي‌نين نتيجه‌سي‌دير. ديني اينانجلار دا باسقي آلتيندادير. ديني تحصيل آلماغا قاداغان اولونوب. يونيوئرسيته‌ده دينين تدريسي قاداغادير. مسجيده گئتمک، اوروج توتماق دا ياساقلانيب. بو قاداغالار مسلمان دؤولت مأمورلارينا دا عاييددير. حتّی پئنسييايا چيخميش (بازنشست اولموش) اينسانلارين دا راحات ديني عيبادتله مشغول اولماسينا امکان وئريلمير. ۱۹۴۹- جو ايلدن بري اليفباميز ۳ دفعه دَييشيب. ايلک اولاراق عرب اليفباسيني کيريل‌له عوض ائتديلر، سونرا اونو لاتينلا دييشديرديلر. ان سونونجو دفعه يئنه عرب اليفباسي تطبیق ائتديلر کي، نسيل‌لر آراسيندا اوچوروم يارانسين. ۲۰۰۳- جو ايلدن سونرا اويغور ديلي‌نين يونيوئرسيته‌لرده تدريسي دايانديريلدي. بوتون بونلار و ديگر اونلارلا سبب اينسانلاري اؤز حوقوقلاريني طلب ائتمه‌يه وادار ائدير.

- دانمارک مطبوعاتيندا محمد پيغمبر حاقيندا کاريکاتورا درج اولوناندا بوتون مسلمان دونياسي آياغا قالخدي. بس، اورومچودا کي حاديثه‌لره مسلمان دونياسي‌نين عكس‌العملي سيزي قانع ائتديمي؟

- بيز ده مسلمان دونياسيندان بونو سوروشوروق. دئييريک کي، اورومچودا مسجيدلري داغيديرلار، سس چيخارميرسينيز، آما پيغمبرين کاريکاتورو درج اولوناندا هامي آياغا قالخميشدي. بو، بير نوع ايکيلي استاندارددير. اسلام دونياسي بيزيم مسئله‌يه صاحیب چيخمالي‌دير. اسلام دونياسي چينين سياسي و اقتصادي گوجونو نظره آلاراق اونونلا مناسبت‌لريني قوروماق ايسته‌يير و بيزه ائديلن ظولمو گؤرمک ايسته‌مير. بو، قبول ائديلمز بير ياناشمادير. يالنيز تورکييه‌نين اورتايا چيخماسي تقديره لاييق حاديثه‌دير. تورکييه‌نين خاريجي ايشلر ناظيري «احمد داوود اوغلو» سون حاديثه‌لري حتّی بين‌الخالق ملت‌لر تهلوکه‌سيزليک شوراسي‌نين مذاکره‌سينه چيخارماغا سؤز وئريب و چينين خاريجي ايشلر ناظيري ايله مسئله‌ني مذاکره ائديب. آيري اسلام اؤلکه‌لري ده بونا بنزر آدديم آتا بيلرديلر. بيز اسلام دونياسي‌نين موقعيندن مأيوس اولموشوق.

- ايکي اوغلونوز چينده حبسده دير. اونلارا گؤره ناراحات دئييلسينيزمي؟

- بلي، ايکي اوغلوم حبسده دير. قالان ۳ بالام، ۹ نوم، ۳ قارداشيم، عوموميتله، عاييله‌ميزده اولان ۳۰ نفره ياخين اينسان دا چين حوکومتي‌نين نظارتي آلتيندادير. سون حاديثه‌لردن سونرا اونلاردان خبر آلا بيلميرم. بوتون علاقه‌لر کسيليب…

قایناق: چوبان ییلدیزی

ایلگیلی لینک‌لر:

رهبر ايغورها شمار ناپديد شدگان را در سين‌کيانگ چين ده هزار نفر دانست.رهبر تبعيدي تركان ايغور وارد ژاپن شد.

بؤلمه لر: خبر و تحلیل |

۲ گؤروش یازی: “ربیعه قدیرین آذربایجان قزئتی ایله دانیشیغی”

  1. فاتح دئییر:
    زومار آیي ۱۴-ي, ۱۳۸۹ چاغ ۵:۳۴ گ.ؤ

    سلام.
    اللرینیز آغریماسین. بو دا آذ. ویکی پدیاسیندا ربیعه قدیرین صحیفه سی:

    http://az.wikipedia.org/wiki/%D۸%B۱%D۸%A۸%DB%۸C%D۸%B۹%D۹%۸۷_%D۹%۸۲%D۸%AF%DB%۸C%D۸%B۱

  2. links for 2010-09-05 « تورکوک بیز Türkük Biz دئییر:
    زومار آیي ۱۴-ي, ۱۳۸۹ چاغ ۱۰:۳۰ گ.ؤ

    […] ربیعه قدیرین آذربایجان قزئتی ایله دانیشیغی […]

گؤروشلر