سون یازیلار

سون گؤروشلر

آرشیو


« درگذشت دکتر معراجی و فاجعه اطلاع رسانی در ایران | آنا یارپاق | درباره دكتر معراجي / عبدالعزيز قائمي »

تک‌مه جوت؟ / اسدالله اميری

آذر ۲۴, ۱۳۸۸

(ديل حاقدا قيسا يازيلار ۱۱)

ساوانين مرغئي کندينين بعضي اويونلاري و دبلري و دئييملريني يازيب ساخلاييرام. بونلاردا بعضاً ايلگينج مسأله­لره راس گليرم:
اولکر سؤزو بير آتالار سؤزونده هله­ده قالير: اولکر شام چيخر(اولکر آخشام چيخار).
نون-غنّه دئديگيميزing: مچيد اؤنگو، داوار اؤنگو، يونگ، دونقوز.
خاص کلمه­لر: داواري سورودن آييرماق ايچين “هؤگور” کلمه­سي ايشله­نير.
اوزان کلمه­سيني “ائمميزه اوزان گلير…” شعرينده بولموشام.
چوخلو تورکجه کلمه­لري اسکي اليازمالاردا و حکيم تيليم­خان شعرلرينده گؤرموشم: “آراسن بولگينن دوروست در ايندي…”
بعضي اويونلاريميزين آدي: گئديب گلمه- گيزلامپوچ- چپرله‌مه- آغاج آغاج- آللاداد- آراکسدي و …
ساوالي بير تحقيقاتچي دوستوم دئيير: آراکسدي اويونو بير مرغئي‌ده وار بير ده تورکمنلرده. اويونلاريميزين بيريسينين آدي ” تگ‌مه جوت” دور. بو اويون اصلينده بير قرعه­کشي کيمي ايشله‌نيلير: بير نفر اووجونا نئچه دانا کيچيک داش ييغيب، داشلاري گؤيه آتيب دوشنده نئچه‌سيني الينه توتابيلير. ايچينده سايي بللي اولمايان داش دولو قاپالي اووجونو باشقا بيريسينه ساري اوزادير و دئيير: “تگ مه جوت؟” بو جومله سؤال کيمي دئييلير و قارشي طرف اونا جواب اولاراق يا “تک” يا “جوت” کلمه‌سيني سؤيله­يير.دوز دئسه اوتوب يانليش دئسه اوتقوزوبدور (اوتوزوبدور). بو اويونون آدي اوستونده آيلار بلکه ايل‌لر دوشونندن سونرا بو نتيجه‌يه يئتيشديم­کي اويونون آديندا “مه” کلمه­سي همان سؤال ائدن” مي- مو” اکي‌دير. بو سونوج دوغرو اولسا، اوندا دئيه بيلريک کي سورغو علامتي اولان “مي” اکي ساوادا بير اويون آدي­ايله ساخلانيليب‌دير. البته آرتيرماق لازيمدير کي سورغو اکي اولان “مي” حکيم تيليم‌خان شعرينده نئچه يئرده ايشله‌نيليبدير.

ایلگیلی لینک‌لر:

دیل حاقدا قیسا یازیلار ۱۱/ سید حیدر بیات

بؤلمه لر: ادبیات, فولکلور و ائل ادبیاتی |

۳ گؤروش یازی: “تک‌مه جوت؟ / اسدالله اميری”

  1. مئهران باهارلي دئییر:
    آذر ۲۵-ي, ۱۳۸۸ چاغ ۹:۰۹ آ.خ

    سلام

    منجه ده تك مه جوت`ده كي “مه” سيزين دئدييينيز تكين، سورو اداتي اولان “مي”دير.

    گيزلامپوچ`داكي -پوچ دا منجه همان -پاچ، -باج اكيدير، بو اك اويون آدي دوزه لده ن اكدير و داها سونرا بير سيرا دوروملاردا -باز`ا چئوريلميشدير (قوشباز، اويونباز، هوشتورومباز،….). بو اكده ن يئني بير نئچه دئگي ده تؤره ديلميشدير: پانتوميم قارشيليغي اولان “تومپاچ” (تومماقدان=دونوب قالماق) كيمي.

  2. بیانی دئییر:
    آذر ۲۶-ي, ۱۳۸۸ چاغ ۳:۵۰ آ.خ

    سلام- دئمه لی یم بیزیم زنگاندا مانیشان و اوریاد ماحاللاریندا دا بو اویون ائله دوز «تکه مه جوت» آدیلا اوینانار. البته بیر عده اونو «تکله مه جوت» ده تلفظ ائدردیلر. من اؤزوم اؤز کندیمیزده بو اویونو بو آددا ائشیدیب و اوشاقلیغیمدا اوینامیشام.

  3. بیانی دئییر:
    آذر ۲۶-ي, ۱۳۸۸ چاغ ۳:۵۷ آ.خ

    یئنی دن سلام- بیز اویونلاریمیزدا اویونو ایلک باشلایانا« پانج» و ایکینجیسی نه «پانجین آردی» و لاپ سونا قالانا« قیققی» دئیردیک. و بو آرادا «قیققی»نین اوره یین آلماغا و اونا حوصله وئرمگ اوچون دئیردیک: « یولداش،عیب ائله مز قیققی نین چؤره گی پیشمیش اولار» / بیانی/ زنگان/ مانیشان/ اوریاد/ آغکند

گؤروشلر