EYVAZ TAHA - ایواز طاها
RIZA HƏMRAZ رضا همراز
ƏLIMÜHƏMMƏD BƏYANI علی محمد بیانی
هادی قاراچای- HADI QARAÇAY
« «دهنامه» شاه اسماعيل ختائي / ا. محمداوف | آنا یارپاق | توركمنلر دياريندا… عاشورا / إدريس تسينلى »
اونونجو گون، بیر ده تورپاق باجیسینین سؤزجوکلری / سید حیدر بیات
چيلله ۱۷, ۱۳۸۷
قطا قوشونو دينج بوراخسايديلار يوواسيندا ياتاردي. بونو دئييب مدينهدن چيخدي. سورگونلوک باشلاندي.
بوتون قوتسال شهرلر، اونا ياساق ايدي.
تکجه رسول مزاري دئييل، آللاهين ائوي ده اونا ياساقلانميشدي آخي!
بشرين، گؤي تانريسينا سوندوغو آبيدهلر،
بوتون قوتسال شهرلر.
باشقا بير قوتسال شهر تيکهجهيم دئدي، و کربلا ياراندي.
آه فضولي دده! «سؤزوم آلتين دئييل، گوموش دئييل، تورپاقدير، آنجاق کربلا تورپاغيدير،» دئدين.
باشقا بير قوتسال شهرين تورپاغي. و شيعهلرين اينانجينا گؤره يالنيز توختادان تورپاق ائله اودور.
منه کربلا تورپاغي، فضولي شعري گتيرين تاسوعا گئجهسينده.
بير ده زنگان عاشيق هاواسيندا صرافين شعريني:
دور اي دعوالار آسلاني / ابوالفضليم علمداريم.
کربلا يالنيز تورپاق دئييلدي. کربلا سو ايدي. سو ياساق ايدي، عابباسين اوخلانميش ائيمهسيندهن تؤکولن سو، فراته مي جالاندي عجبا؟ يوخسا تاريخ بويو آلتبيلينجيميزده حقيقتين بير چئشيدي اولاراق ، سورکلي آخدي؟ و سوسوزلوق دنيز ايدي. سو آراما، سوسوزلوق آرا، چوخ سونرالار دئدي مئولانا. سوسوزسانا سويون بوتون يئر گؤيدن داشلاناجاق، دئدي مئولانا. آنجاق حسين سنهلر دئييل قرنلر اؤنجه ائله سوسوزموشدو کي.
و او قوتسال شهرين کرپيچلري تورپاق ايله سو دئييل، تورپاق ايله سوسوزلوقدان اولوشا بيلميشدي. او قوتسال شهر، بام باشقا بير قوتسال شهر، قطا قوشونون قوندوغو يئر.
قطا قوشونو دينج بوراخسايديلار يوواسيندا ياتاردي آخي.
کربلا، تورپاق، سوسوزلوق بير ده آلاودير.
خيمهلرين ياخيلديغيندا، « آه! تاريخ بويو هر يئرده بير خيمه ياخيلديسا، تاريخ سنه دوشوندو»
ياندي خيمهلر، ياندي و تاريخ سوسدو. او بويدا تاريخ کيتابلاري يالنيز يزيدين مئيمونونو رئکلام ائديرديلر. آنجاق گئرچک تاريخ اولوشماقداايدي زينبين بوغازيندا، بشيرين شعرينده.
هه، مدينهليلر! گووهنمک يئري قالمادي/ حسين اؤلدو/ گؤزلريمده ياش داشلانير/ حسين اؤلدو/ گؤودهسي کربلاده قوملار اوسته سرگيلهنيب، باشي جيدالرده دولانير.
«او نئيزهدن باشين اَي بير قويوم اورک باشينا.» بونو زينب دئميشدي.
قوتسال کيتاب نئيزه باشيندا دوداقلانير. يزيدين مئيمونو هلهده رئکلام اولور، و تورپاق آتاسينين قيزي، سؤزجوکلرين باشيني اوجالدير شامدا.
سؤزجوکلر هئچ او گونه کيمي او قدر سئوينمهميشديلر. ياورو سؤزجوکلر، اووچولار يانيندا نه ده باشي اوجا قانادلانا بيلميشديلر، او گون. او گون اووچولار سؤزجوک ياورولارينا يئنيلديلر. او گون يزيد يئر آختاردي مئيمون آرخاسيندا، گيزلنمهيه.
و تاريخ مئيمونو رئکلام ائديردي.
هله ده مئيمونلار رئکلام اولونور، هله ده سؤزجوک ياورولاري اووچولار اؤنونده، هله هئچ زاد دهييشمهييب اخي، و اونونجو گون، بير ده تورپاق باجيسينين سؤزجوکلري قانادلانديرماسي، تکثير اولماييبدير چاپخانالاردا.
*
گونئيده ياساق سؤزجوکلرله يازديم سندن يا حسين!
قطا قوشونو دوشونن بير سؤزجوک
قوتسال شهرلردن سورگون
سوسوز
مئيمون رئکلامچيلاري، سانسور ائتسهلر هئچ شاشماياجايام.
يالنيز کربلا ده گليب حيرته دالاجام، بيديل دئيهن گوزگونون اؤنونده: « بيزده ايلقار يوخ، گوزگو کربلادادير»
قوتسال شهرين گوزگوسو اؤنونده،
سؤزجوکلري
قانادلانديراجام.
بؤلمه لر: ادبیات, دین و توپلوم, گوندهلیک یازیلار/ یادداشتها |
چيلله ۱۷-ي, ۱۳۸۷ چاغ ۱۲:۳۰ آ.خ
[…] اونونجو گون، بیر ده تورپاق باجیسینین سؤزجوکلری / س… […]
چيلله ۲۱-ي, ۱۳۸۷ چاغ ۲:۰۹ آ.خ
یاخشی بیلیرسینیز کی بونلار ین چوخو تحریفات و ناغیلدیر و تاریخه ده دویغوساللیق ایله باخماق اظ صلا دوز ایش دئییل. ساغ قال
—
من تاریخ یازاندا سند وئره رم آنجاق دوز یازی یازاندا بئله بیر شئییه احتیاج گؤرمه ییرم.
نه یاخشی اولار کی بئله یازیلاری مستعار آدلا دئییل اؤز آدینیزلا یازاسیز.
تاریخی تنقید ائتمک گیزلی آد ایسته میر منجه.
چيلله ۲۲-ي, ۱۳۸۷ چاغ ۱۰:۳۶ آ.خ
سایین حسینی بعضی حادثه لرین واقعیتی اولسادا، اولماسادا اؤنملی دئییل، اونملی اولان او حادثه نین حقیقتی دیر…
هر زامان حقیقت واقعیت دن بیر آددیم ایره لی و بیر پله یوخاری دیر.
چيلله ۲۳-ي, ۱۳۸۷ چاغ ۱۰:۳۳ گ.ؤ
اولسون افندیم. گؤروشونه گله جم ایلک فورصتده. آخی تاریخا گیره رک حیران قالدیم دوغروایله یالان آراسیندا…مگر قران و محمد(ص) بیردئییل؟بس بو شیعه -سنی اویونو نه دئمکدیر؟…آنجاق منجه تاریخا داییر دویغوسال اثر یاراتماق بو یانلیش لارین اتگین اوزاتماقدیر. بیز ادبی یازیلاریمیزی کندی دردلریمیزه داییر یازساق داها ایی دیر. پورپیرار دئیه نی: تاریخ چی نین نه دینی وار، نه میللیتی. گرکی بو چوخ ایده آل بیر باخیش دیر آما منجه تاریخا دین و مذهب و میللی تعصب ایله یوخ بلکه دین و مذهب و میللیته تاریخ چی گؤزوایله باخمالی ییق. چون کی مذهب و میللیت ده تعصب و دویغو گرکیر آما تارخ دا عقل. دویغو گؤزو تاریخی ایسته دیگیمیز کیمی گؤرر و گئچمیشلرده یاشادار اینسانی آما عقل گؤزو تاریخدان گله جگین چیراغین آختاریب و گله جگه ماراقلاندیرار اینسانی. باخین سایین اوستادیم! ایندی سه ایران آدلانان اؤلکه ده ایکی قوروپدور اینسانلار! بیر قوروپ مدینه و کربلا و هابئله خیال سل مذهب اوتوپیاسیندا یاشیرلار و بیر قوروپدا شیرازین و… خرابه لرینده کوروش و داریوش ایله قول بویوندولار! بیز چیمالی ییق بو تاریخ اتوپیاسیندان دوزلمیش یومورتادان….. البت یانلیش آنیلماسین، نصیحت ائتمیرم. معاذالله! بلکی اؤز دوشوندوگومو دئدیم.
—
شیعه سنی مسئله سی باشقا بیر مسئله دیر اونودا عالیم لر یئرینده بحث ائدیبلر و من هله لیک او مسئله یه توخونمانی یئرسیز گؤرورم. اما تاریخه باشقا آچیلاردان دا باخماق اولار. تاریخ ده یالنیز حقیقت دئییل اؤز یاراتدیغیمیز نسنه لری ده آختارمالی ییق. اسطوره وی آنلامالار, حماسه لر و…
تاریخه یالنیز تاریخ گؤزو ایله باخانلار تاریخچیلر اولا بیلر. اونو دا اولا بیلسه لر. اما من دئدی ییم کیمی باشقا آچیدان دا تاریخا باخارام. و البت بو آچی نی تاریخه عایید یازیلاراما دا قاتمارام.
ساغ اولاسیز
چيلله ۲۳-ي, ۱۳۸۷ چاغ ۳:۲۸ آ.خ
دقیقا دوز دئدین. چونکو من تاریخ گؤزو ایله باخماق ایستیرم باخابیلسم!! آما دوغروسو عالیم گؤرمه دیم تاریخا دوز باخا و بئله تنگه گلدیم کی دئدیم کاش کؤکوندن گیرمه یه یدیم تاریخا! آما صبر گرکدیر بو چتین لیک لره.
مهدی بی! شریعتی نین دیل بازلیقلاریدیر بو سؤزلر! تاریخدن اسطوره یاراتماق ان بؤیوک خیانتدیر اینسانلارا. اسطوره دن تاریخ یاراتماق و عکسینه هر ایکی سی ده چوخ خطرناک بیر ایشدیر میللت لرین حیاتینا.
هر شئیین اؤز یئر وار. الله خاطیرینه قاتمایین بونلاری بیربیرینه. ده ده میز یاندی بو التقاط لاردان!
چيلله ۲۳-ي, ۱۳۸۷ چاغ ۳:۲۹ آ.خ
sag olun
دوندوران ۲۹-ي, ۱۳۸۷ چاغ ۱:۱۳ آ.خ
سالام اللرینیز آغریماسین