سون یازیلار

سون گؤروشلر

آرشیو


« نتایج مسابقه داستان نویسی محمود کاشغری | آنا یارپاق | هزارمین سالگرد تولد محمود کاشغری، نویسنده کتاب دیوان لغات الترک در ترکمنستان، گرامی داشته شد »

سلمانی‌لار، وئبلاگچی‌لار و وئبلاگ تانیتیمی

چيلله ۴, ۱۳۸۷

عمران صلاحی‌نین “دنیای سخن” نشریه‌سین‌ده بیر کؤشه‌سی وارایدی. آدی یادیمدان چیخیب کؤشه‌نین، آنجاق اورادا ع. شکرچیان آدیلا یازاردی صلاحی. هه، کؤشه‌نین آدی‌ دا خاطیریمه گلدی: «حالا حکایت ماست». صلاحی بیر یول اورادا تیتر ووردو: «مصاحبه با آقای شکرچیان» و موصاحیبه‌نین ایلک سطیرلرینده یازدی: سلمانی‌لارین الی بوشا چیخاندا بیربیری‌نین باشینی چالارلار.
نه ایسه، آلما یولوندا بو گونلر یئل اسرکن، یولداش سیته‌لرده اولان یازیلاری اوغورلاییم، یاییملاییم دئییرم. سونرا دا بیر حیکایت آخوند ملا علی همدانی‌دان خاطیریما گلیر. دئییر بیر همدان موللاسی بیر کیتاب یازیب آخوندا گؤستریب، آخونددان نظر ایسته‌ییر، آخوند ایسه باخیب دئیه‌رم دئییر. نئچه گون سووشور. موللا دیله گلیب، آخوند، کیتابا باخدیز هئچ؟ سوروشور. آخوند «هه، باخدیم دئییر، بیر شئیی بیلمه‌دیم. آخی بو یازیق حدیث‌لرین گوناهی نه دیر او کیتابدان چیخاردیب یازیرسیز بو کیتابا، بو کیتابدان چیخاردیب یازیرسیز او کیتابا؟»
هه! یولداش سیته – وئبلاگلاردان دا یازی آلاندا بئله بیر ایشه اوخشاییر. آیریجا اینگلیس‌لی‌لرین دووارا یازمالی بیر مثل‌لری ده منیم چوخ اوره‌ییمه یاتیب. بو مثل بئله دیر:« یازیلان شئی یاییملاماق ایسته‌مز.» یانی یازی، یازیلان یئرده اثرینی بوراخاجاق‌. باشقا تعبیر ایله بیر یازی، یازیچی بئینیندن چیخماق همان، بشرین معرفت‌لرینه بیر شئی آرتیرا بیلرسه آرتیریب‌دیر.
بونلا بئله بیر ایکی لینکی تانیتدیرماق بلکه ده پیس اولمایا. یوخ! اولمادی. من بو سون گونلرده سئودی‌ییم وئبلاگلارین آدرسینی سیزه یازسام نئجه‌دیر.
۱. یاشماق: یاشماق بو گون‌لر یامان اودلو یازیر. آخی یاشماق بیر آز ایفلاسا و پولسوزلوغا اوغراییب. آیریجا یئنی کیتابلاری دا تانیتدیریر. هله آلما یولو شعر کیتابی نی‌دا تانیتدیریب‌دیر.
۲. دوشرگه: همت بی شهبازی، یا اؤزو یازار، یا یولداشلارینا یازدیرار، یا داکی گؤردو ایش چتینه چیخیب، دوشرگه ده یئل اسه‌حک تئز بیر یاخشی متن اوتایدان کؤچوره‌ر. همتین فرقی منیمله بودور کی او سورکلی ادبیاتدان یازار، چاغداش ایله کلاسیک ده فرق ائله‌میر. ادبیات اولسون، هر نولاجاق قوی اولسون. بیر ده اوتای بوتای دا فرق ائله‌میر. اونون بو روحیه‌سینی سورکلی سئویرم.
۳. آدیازار: راسیم قاراجا کاغیذ ژورنالیندا اوغور قازانارکن (آلا توران) ایندی مجازی دونیایادا چوب اوزادیر. منجه راسیم کیمی‌لرین روحیه‌سی سئومه‌لی‌دیر. آخی ائله آداملار تکجه اؤزلرینه دئییل، ائل‌لرینه و یولداشلارینا دا چالیشیرلار. دوغروسو یالنیز اؤزونه چالیشان آدامدان ائله آجیغیم گلر کی. البته مسئله‌نین او بیریسی یؤنوده وار. بعضی‌لری ده اؤزلرینی اونودارلار و یالنیز یولداشلارا و ائله چالیشارلار. بو قونودا گؤزومله گؤردویوم اینسانلاردان، سایین دوستوموز فتح الله به‌ی ذوقی، ان قاباریق اؤرنک‌دیر. اونون بو خیصلتی همیشه منی اینجیدر.
آدیازار قوزئی ده یاییملانارکن، گونئی ادبیاتینا دا سورکلی، دوْلو گؤز باخیر، آلا توران کیمی.
۴. زنگین: بو وئبلاگ «زنگانلی‌لارین ادبی درنه‌یی» باشلیغیلا هر گون گونجل اولور. همیشه ده بیر اوخومالی یازی اورادا تاپماق اولار. زنگانلی اولدوغوم اوچون، منی ده هرده‌ن خاطیرلایارلار. ساغ اولسون‌لار.
۵. تورکوک بیز وئبلاگینی دا اونوتماق اولماز. البته بو وئبلاگ عمران صلاحی دئدی‌یی سلمانی‌‌لارین ان موکممل اؤرنه‌یی‌دیر. یانی لینک‌لر وئبلاگی‌دیر. آلما یولو چوخلو بو وئبلاگین لینک‌لریندن قوللانیب ایلگینج مطلب یاییملایا بیلر.
۶. سؤزوموز وئبلاگلاری دا کی دای ابلیسین کوفروندن ده مشهوردور.
۷. آنا یوردوم وئبلاگی دا تقریبا آیدا نئچه یول گونجل اولار. بو وئبلاگ‌دا آرتیق بیر وئبلاگ کیمی پروفسیویونال چالیشماغی گؤز اؤنونه آلیب، آنجاق نظره گلن آیدین. ک به‌ی بیزیم ایلک وئبلاگچی‌لاریمدان اولارکن بو گونلر بیر آز حوصله‌سیز اولوب.
۸. جاهان، مسیح آقا محمدی‌نین وئبلاگی‌دا اوخومالی‌دیر. مسیح آقا اسکی خطی، یانی ایندی من یازدیغیم خطا – و فارس دیلین بیلدی‌یی اوچون بوتایین فضالارینی دا چوخ یاخشی تانیر. اونون یازیلارینی‌ معمولن اوخویارام. بو اسکی خطه گلمیشکن: سعید موغانلی دئییردی: اوتایلی‌لاردا دئدیم، آقارداش بو نئچه حرفین اؤیرنمه‌سی نییه سیزه بئله چتین اولوب؟ سیز بیر گون، لاتین یازدیر اؤیرندیک، بیر گون سیرلیک یازدیز یئنه اؤیرندیک، سونرا باشقا چئشیت لاتین یازدیز یئنه اؤیرندیک، آما سیز هئچ زامان بو خطی اؤیرنمه‌ییرسیز نییه؟ (دیرناق آراسی: بو بؤلومو هادی به‌ی قاراچای اوخوماسین لوطفن، سیز ده اونا بیر شئی دئمه‌یین بو قونودا)
۹. باشقا وئبلاگلاردا وار. مین بیر گئجه‌نی قاباقدان دا تانیتدیرمیشدیم. بایقوشو و ایملری ‌ده کی هامی تانیر. آما بلکه فورصتدن سوء استفاده ائدیب، آلما یولوندا کاشغارلی‌یا مستقل بیر بؤلوم یولا سالدیق دئسک پیس اولمایا.

یاشاسین وئبلاگچی‌لار.

یازیدان سونرا:
بیر: بو نئچه واختی وئبلاگ سؤزجویونو هرده‌ن بیر جور یازیرام. هله بیر واحید ایملایا ال تاپمامیشام. بونو وئبلاگ، وئبلوگ، وئبلاق و وئبلوق کیمی یازانلار دا وار. ایواز طاها دوشرگه‌نی اؤنرمیشدی. همت شهبازی ایسه وئبلاگی‌نین آدینی دوشرگه سئچدی. من ایسه بیر آلمایولونو بیه‌نمیشم هر نه وئبلاگدان، کیتابدان یاییملاسام ائله اونو سئچیرم. آخی دئییر: موللا نصرالدین‌دن سوروشموشدولار، نئچه یاشین وار، دئمیشدی، ۴۰ یاشیم، نئچه ایل سونرا همن سورویا همن جاوابی وئرمیشدی. دئمیشدی‌لر آخی سن نئچه ایل بوندان اؤنجه ۴۰ یاشیندا ایدین، دئمیشدی: کیشی‌نین سؤزو بیر دنه اولار

ایکی: همیشه بیر اؤنملی مسئله اونودولار. یازی وئبلاگینی اونوتموشدوم. سایین ناصر به‌ی مرقاتی بیزیم اؤنجول شاعیرلریمیزدن اولارکن نیت‌دن ده اوزاقدا قالماییر و بو ساحه‌ده ادبی تجروبه‌لرینی اوخوجولارلا پایلاشیر.
اوچ: وئبلاگلارین لینکینی آرتیرارکن تورکوک بیز وئبلاگیندا گؤردوم: ایواز طاهانین رسمی سیته‌سی یولدادیر. هله‌لیک ایواز.اورگ وئبلاگین‌دا ایواز به‌یین یازیلارینی اوخویا بیلرسیز.

بؤلمه لر: گونده‌لیک یازیلار/ یادداشتها |

۷ گؤروش یازی: “سلمانی‌لار، وئبلاگچی‌لار و وئبلاگ تانیتیمی”

  1. آيدين ك دئییر:
    چيلله ۴-ي, ۱۳۸۷ چاغ ۸:۴۸ گ.ؤ

    سلام
    منيم وئبلاقيمي بورادا، تانيتديرماق ايچين قابيل گؤردوغونوزه گؤره ساغ اولون. بو آلقيش ايله باعيث اولدونوز حؤصله م چوخالسين!
    –
    اصلینده سیزین وئبلاگ تانیتدیرماق ایسته مه ییر. تانی یانلار تانیر.

  2. بیر دوست دئییر:
    چيلله ۴-ي, ۱۳۸۷ چاغ ۸:۵۳ گ.ؤ

    سلام
    روزنامه امین آذربایجان شرقی سراسری شد:
    لینکهای مرتبط:
    http://www.rezaee.ir/fa/pages/?cid=۶۹۸۹
    http://www.parsine.com/pages/?cid=۲۵۷۰
    http://toponimler.blogspot.com/۲۰۰۷/۱۰/blog-post_۲۶.html

    —
    بو روزنامه نین تورکجه بؤلومه ده وار می؟

  3. بیر دوست دئییر:
    چيلله ۴-ي, ۱۳۸۷ چاغ ۸:۵۶ گ.ؤ

    دربار تبریز:
    http://www.rifs.ac.ir/tabriz.aspx

  4. Xezer دئییر:
    چيلله ۴-ي, ۱۳۸۷ چاغ ۲:۵۶ آ.خ

    http://www.tdtkb.org/index.php?option=com_content&task=view&id=۴۹۴&Itemid=۴۱

  5. اوزون گولسون بایات به‌ی! « تورکوک بیز Türkük Biz دئییر:
    چيلله ۴-ي, ۱۳۸۷ چاغ ۷:۳۰ آ.خ

    […] دسامبر ۲۴, ۲۰۰۸ at ۴:۳۱ ب.ظ | In تورکجه, گونلوک | بایات به‌یین «سلمانی‌لار، وئبلاگچی‌لار و وئبلاگ تانیتیمی» یازیسینین ائله باشلیغینی گؤردوگوم زامان اؤزوم ایله […]

  6. وئبلاگ سؤزجوگو نئجه یازیلمالی « تورکوک بیز Türkük Biz دئییر:
    چيلله ۴-ي, ۱۳۸۷ چاغ ۹:۵۱ آ.خ

    […] at ۶:۵۱ ب.ظ | In تورکجه, وئبلاگ و وئبلاگچیلیق | بایات به‌ی بویورموش: بو نئچه واختی وئبلاگ سؤزجویونو هرده‌ن بیر جور […]

  7. وئبلاگ سؤزجوگو نئجه یازیلمالی « تورکوک بیز Türkük Biz دئییر:
    چيلله ۵-ي, ۱۳۸۷ چاغ ۶:۳۹ گ.ؤ

    […] | وئبلاگ سؤزجوگو نئجه یازیلمالی بایات به‌ی بویورموش: بو نئچه واختی وئبلاگ سؤزجویونو هرده‌ن بیر جور […]

گؤروشلر