EYVAZ TAHA - ایواز طاها
RIZA HƏMRAZ رضا همراز
ƏLIMÜHƏMMƏD BƏYANI علی محمد بیانی
هادی قاراچای- HADI QARAÇAY
« تبريزده قورخو گؤتورمه دبلرينده شامان ايزلري / توپلايانلار: علي برازنده تورک- پينار شاکري | آنا یارپاق | نصرت الله فتحي مفتش تاریخ مشروطیت / رضا همراز »
باش اوجا ائلیمین سیرداشی رضا همراز / اکبر قدیمی
قويروق دوغان ۱۳, ۱۳۸۷
گیریش
ایللر اؤنجه ، ایلک دؤنه بیر اؤیره نجی اولاراق ، اولو تبریزیمیزین ماشین قاییرما فابریکاسینا آیاق باسدیغیمدا تئکنیکسل آراجلارینا هویوخدوغوم او توزلو- دومانلی اورتامین بیر بوجاغیندا تام بیر جننت بنزرلییی ایله سس سیز – سمیرسیز بیر یئر ده بولموشدوم : بیر کیتاب ائوی.
ائله هایلی- کویلو یئرلرده اولدوغو گؤزله نیلمه ین، سس سیز – دینج و چئشیدلی بیلیمسل- تئکنیکسل کیتابلارین یانیندا اونلارجا آذربایجان وارلیغی و مدنییتی قونوسوندا تورلو- تورلو کیتابلارین دا اولماسییلا ایچده ن اوخویوب اؤیره نمه هوسینی آرتیران او جننتین قوروجوسو ریضا بیگ همراز ایدی . من ریضا همراز بی ین قایغی و چالیشمالارییلا جننتسل اؤزه للیکلر قازانمیش اولان او کیتاب ائوینی گؤرمه دن اؤنجه ، آدینی اونوتدوغوم بیر بؤیوک فیلئسوف دان اوخودوغوم “منجه جننت بیر کیتاب ائوینه بنزردیر ” سؤزونو، تام آنلامییلا قاورایا بیلمه میشدیم و بیله مه زدیم ده. اورادا اولدوغوم او ایکی ایلده ان خوش آنلاریم ریضا همراز جنابلارینین یانیندا اولاراق یاشاندی. ایندیلر دوشوندوکجه، الیمده اولان بوتون معنوی وارلیغین وسونرالار یاشایشیمی ائتکیله ین بیلیکلرین بویوک بیر بؤلومونو درس ساعاتلاری آراسیندا سیغیندیغیم او کیتاب ائوینده و او بؤیوک اینسانین یاردیملاری کؤلگه سینده الده ائتمیش اولدوغومو گؤروره م.
هر چاغ یازی- پوزویلا اوغراشاراق گؤزونون ایشیغینی کاغاذلارا توکوب بوتون وارلیغینی ائل یولوندا قارشیلیقسیز اولاراق ساووران و عؤمور- گونونو کیتاب آرخاسیندا کئچیره ن بؤیوک آراشدیریجی ریضا همراز جنابلارینی هر گؤردویومده بیر عؤمورلوک بئینیمه تاخیلیب هئچ زامان ائتکیسی ایتمه ین اؤیره ندیکلریم اولوردو. دئمک منیم گئرچک بیلی یوردوم او کیتاب ائوی اولدو.
ریضا همراز و تبریزلی شمس ریضا همرازجنابلارینین آدینی چکیب ده ، دیرلی “شمس تبریز ” هفته لییینده ن آد آپارماماق ممکن دئییل . من ده بیر چوخلاری کیمی او هفته لییین قیزقین اوخوجوسو اولماقلا دوغرو- دوزگون کیملیییمی اؤیره نیب وریضا همراز جنابلاری باشدا اولماق اوزره ، بیر چوخ یازارلارینا -ایسترسه یاخیندان گؤروشمک لرله ایسترسه ده اوزاقدان-اوزاغا هفته لییی اوخویاراق - اؤیره نجیلیک اونورونو منیمسه میشم. او زامانلار « شمس تبریز » هفته لییینین هر یئنی ساییسینی بیر نئچه دؤنه اوخویوب تورک دیلینی اؤیره نمک آماجییلا تورکجه یازیلارینین اوزونده ن دؤنه – دؤنه یازاردیم . سونرا ریضا همراز جنابلارینین باشینا قاچیب بیلمه دیکلریمی سوروشونجا وئردییی آچیقلامالارلا قارانلیق قونولار آیدینلیغا چیخاردی. عؤمورومده اونون کیمی یورقونلوق بیلمه دن ، هر زامان گؤردویومده یازی پوزویلا اوغراشیب آلیشان بیرینی گؤرمه دیم. بونلارین هامیسینی اؤزوم ایچین اؤیره نیلمه سی گره ین بؤیوک درسلر کیمی سانیردیم.
همراز جنابلاریندان آلدیغیم درسلر و«شمس تبریز» له برابر بیر چوخ درگی ، ژورنال ، هفته لیک و … یازیلان مقاله لر منیم ایچ یانقیما تؤکولن سرین سو سایاغی جانیمدا روح دینجلییی تؤره دیردی. بو نده نله بیر چوخ یازیلاری اوخویوب – اوخویوب ازبر اولموشدوم. بو مقاله لرین ایچینده همراز جنابلارینین یازدیقلاری ایسه اؤزه ل یئر توتوردو. بونون نده نی ایسه یازارین گؤنولد ن بیه ندیییم و منیمسمه یه چالیشدیغیم یازی و آراشدیری یول - یؤنده می ایدی . گونده لیک ایلیشکیلرینده ، ائل ایچینده اولدوقجا ادبلی ، سایقیلی آلچاق کؤنول ریضا همراز بی الینه قلم آلدیقدا تام آیری بیر یؤنده مده آجیماسیز، سرت و جسور گؤرونوردو. ائله بو جسارت دولاییسییلا زوربالیقلار گوجونه اونودولموش بیر چوخ کیشیلرین آدی ایلک دؤنه اولاراق بو ییلماز یازارین الییله بیر داها دا دیللره دوشدو . منجه «بهار شیروانی آیینه بهار خراسانی» ،«تاریخچه دانشگاه تبریز» تقی ارانی ؛ خلیل ملکی ، مشروطیته عاید مقاله لر، اوستاد فرزانه یه گوره یازیلاری باشدا اولماق اوزره یوزلرله باشقا چالیشمالاریندا دا باشلیجا ده یر ائله همین جسارت دن قایناقلانیر.
او کور تعصب دن ایراق دوراراق تام آنلامییلا تعهدلو بیر آراشدیریجیدیر. ائله بو اوزده ن ده بوتون آراشدیریلان قونولارا یانسیز بیری اولاراق یاناشیب گئرچه یین اؤزونو ، دوغرو اوزونو الده ائتمه یه چالیشیر. بوتون بو سایدیقلاریمیز ریضا همراز جنابلارینا بو یولدا آددیملایانلاردان تام فرقلی بیر نئجه لیک وئره رک یازاری آیری و هله لیک کیمسه نین گئده بیلمه دییی یوللارا گؤتورور.
ائله بو تایسیز اؤزه للیکلر کؤلگه سینده احمد کسروی کیمی آزیب ائلده ن قووولموش بیر چوخ کیشیلرین وارلیغینداکی قارانلیق یؤنلره ایشیق توتوب آذربایجانلی و تـورک کیملییی نین ایزلرینی سئزمک کیمی بویوک اونور همین بو یازارین پایینا دوشور. احمد کسروینین تورک دیلی قونوسوندا یازیب اؤنجه عربجه و عرب قزئته لرینده آردیجیل مقاله لر بیچیمینده سونرا ایسه اینگیلیزجه اولاراق ایران دیشیندا یاییلان کیتابینین ، ایراندا دا چاپا وئرمک آماجییلا ائدیلن فارسجا چئویریسینه اؤن یازی اولاراق و کیتابا باسیلما اجازه سی وئریلممک دن سونرا « زبان ترکی در ایران» آدییلا بیر مقاله بیچیمینده ائشییه چیخان یازی چاغداش آراشدیریجیلیغیمیز و ادبیاتیمیزین ان دیرلی یازیلاریندان بیری دیر.
ادبیات ، تاریخ و کولتور کیمی گئنیش آلانلاری قاپسایان آراشدیرمالارییلا چاغداش آراشدیریجیلار اؤنونده یئنی قاپیلار آچیب میللی وارلیغیمیزدا یئنی ایزلر بیراخان ریضا همراز جنابلارینین مقاله لرینی توپلادیغیمیزدا زنگین بیر انسیکلوپئدییا(دایرةالمعارف) اورتایا چیخاجاغی اینانجیندایام.
شعر و شاعرلیک
حضورونا گئتدیییم او ایلک آیلاردا اؤزو اوزه چیخارتماسا دا شاعر لیک روحونا اییه اولماسی یئددی آغاجدان بللی ایدی. سونرالار اؤز ملاحتلی سس ایله شعرلرینی ائشیتمک سئوینجی منده بؤیوک بیر موتلولوق یاراتدی. او شاعر و ادبیاتچیدیر ائله بو اوزده ن ده بیر چوخ کیشیلرین گیزلی قالمیش شاعرلیک یاشاملارینی اورتایا چیخاریر. ائل قهرمانی محمد امین رسولزاده نین شعرلرینی و تورک اولاراق اؤزگه چیراغینا یاغ اولوب یانان دهخدا نین آنا دیلینده کی شعر لرینی ایلک اولاراق همراز جنابلارینین بو قونولارا آییردیغی مقاله لرده اوخوموشدوم. ریضا همرازین مقاله لرینین اؤنملی بیر بؤلومو شعر و شاعرلیک قونوسوندا دیر. همرازین شاعرلییه و شعره اولدوغو درین باخیشینی «نئچون ستار گول محمدی نی سئویرم » آدلی مقاله سینده گؤرمک اولار. ” شعر دیلی تمیز و ائلین دانیشدیغی کؤکلو دیلده اولمالیدیر” ، “اوخوجویلا شاعر آراسیندا بیر یاخینلیق اولمالیدیر ” ، “دوغرو شاعر شعر و شاعرلیکده اؤزونده ن نئچه کؤینک آرتیق ییرتمیش اولانلارا سایغیلی اولمالیدیر” و “شاعر ائله -اولوسا دوداق بوزدویو زامان ائلده ن قوولار” و بونلارا تای باشقا شاعرلیک تؤره لری و اخلاقیاتی ائله همین یازیدا ۲۱ جمله ایچریسینده اورتایا قویولور. بو قوراللارین هامیسینی اونون اؤز شعرینده ده گؤرمک مومکندور.سونوندا رضا همراز جنابلاریندان بیر نئچه شعری اؤرنک وئرمه یی قونویا اویغون گؤروروک :
ارك
اركه باخاندا
بوركوم باشيمدان دوشور
تاريخينه باخاندا
اليمی آلنيما قويورام
بوگونونه باخاندا
هئي
بير اليم اوره يمده
بوبيريسين گوزومه قويورام
۱/۵/۸۶
گؤي مچيد
گؤي مسجيدی گورنده، گووهنيرهم اؤزومه
آغ قويونلولار؛ قاراقويونلولار
بير سينما پرده سی تك گؤز اونومدن كئچيرلر
آنجاق اورادا گزنده؛ آياغيمی يئر اوزونه قوياندا
حئييفيم گلير تورپاغا
آخ بيليرسيز
من گزدییيم تاريخ اوردا گيزلهنيب
۱/۵/۸۶
بؤيوك سمفونو
دنيز، دنيز بويوك بير سمفونيا
گمیلرين شاپپيلديسی
شپهلرين قايالارا اؤزلريني چيرپمالاری
ساحيللره اؤزلريني سرمهلري
گؤزهلجه قوشلارين
دويغودان لپهلهنن نغمهلری؛ سسلری
باليقچيلارين هاي لاري – كوي لري
«تور دولدو تاريم اولدو – قايغيم ياريم اولدو »
سونالارين حزين – حزين آغلاييشي
آه دنيز؛ دنيز
بويوك بير سمفونيا
سومسوك ايت
داش دوشسون باشينا كولباش سومسوك ايت
نيچون تكليكينده سئوَللهنيرسن
بو چؤلو بو باييري
باخ
آجيندان قارنی نين نازيك دريسی
قابير قاوا ياپيشيب
سن كيمی لر قهرمانجا تكليكده
يوزلر داوار قورويور
داش دوشسون باشينا كولباش سومسوك ايت
باخ اؤيرهن ياشاماغی باری تايیندان
نصيحت
غريبهدير
بير بارماغين اوستومه توتسا دا
حله دورد بارماغي اوزو بيلمهدن اؤزونه نصيحت وئرير
غريبهدير
اؤز گؤزونده بير ديرهيی گؤرمهدن
كيمی سينين گؤزونده
بيرجه چوپو تئز سئچير
۲۰/۱/۸۷
اولولر
اولولرين بير سيراسی دئييرلر
هئي يئريز بوش!
سانكی بوردا گونوموز بارات گئجهسی دير!
اما
اولولرين بير سيراسي دئييرلر
آمانين بير گونو دور
اؤلمك ده كي حالوا پايلامير لار
هرنهديرسه
يئرين اوزو آلتيندان يئی دير
۲۰/۱/۸۷
يئنه دردلي ارك
باخيرديم
ارك-ين كؤلگهسی
اوجا تبريزين كوچهلرينه دوشدو
رسام؛ اركی قوجا تبريزده چكمك ايستهييردی
يازيق رسام
هانسی كوچهلرده
۱/۵/۸۶
قوجا ليق
بير قوجادان سوروشدولار
قوجا عمی سونكو آرزين نه دير سنين؟
او قوجا نين ايكی گؤزو ياشلا دولوب بئله دئدی
- ديلهييرهم اوشاق اولوب اوشاقلارلا گيزلانپانجی قيزيشديرام
اويناياركن اونلار يوموب گؤزلرينی من گيزلَنم
او يئرده كی داي قوجاليق تاپانمايا بيرده منی
سون سؤزبو نئچه ایللیک تانیشلیغین سونوندا ،” سایدیقلاریم کسین لیکله گئرچه یین هامیسی دئییل ده ، دنیز دن گؤتوره بیلدییم اؤلچوده سو و اونون وارلیغیندان دوشونجه گوجومه و آنلاییشیما باغلی اولاراق آنلایابیلدیکلریمدیر” کیمی بؤیوک بیر گئرچه یی دیله گتیرمه لییم . گلجکده بو اوماجاقسیز آراشدیریجیمیزا آییرد اولوناجاق یازیلاردا داها ده یر لی مقاله لرین اورتایا چیخاجاغینی اینانیرام.
بؤلمه لر: ادبیات, تاریخ, تورک و آذربایجان عالیملری |
زومار آیي ۱۸-ي, ۱۳۸۷ چاغ ۵:۲۷ آ.خ
سالاملار سیزه
من سیزدن بو گوزل و دیرلی وبلاگیز اوچون چوخ تشککور ائدیرم .
من تانیمادیقیم جیناب همراز بیلرینی تانیدیم بونون اوچون هم سیزه و هم جیناب اکبر قدیمی بیلرینه چوخ تشککورومو بیلدیریرم .
اومودوم وار هر زامان اوغورلارا دوغور گئده سیز
هله لیک
تانری آمانیندا