سون یازیلار

سون گؤروشلر

آرشیو


« دردهای شرقی نویسندگان / سید حیدر بیات | آنا یارپاق | انسانهای بزرگ / راحله احدی »

بیزدن بیزی آلانمازلار / اسماعیل جمیلی

قوراپيشيرن ۱۴, ۱۳۸۷

آلینمیش سانیرلار
یاش داشیم کوچه لری
ساتیلمیش دورتولنلر
قورخودان باغیریرلار
قورخوتماق ایسته ینلر
پاسلی یالانلاردان آسلانیرلار
چوروک چاتلاق چیرکینلر
چاغین چئوریلن چرخی
آخساسین بلکه

گئجه یه تاپیرلار
پئرسیمیش یاراسالار
یئنی سحر آچیلماسین بلکه
یوبانان گونش
یوللارا ایشیق ساچماسین بلکه
سئودا سایاچیلاری
سورگون قارانقوشلار اوچماسین بلکه

گرچکلره اینانمیرلار
چاره سیزلیک چیخمازیندا
کوفلو کؤهوللرده بسله‌ننلر
گؤزه‌للیگه گؤزه‌له‌مه دئینلره
سئوگی یاساق سسله‌ننلر

گؤزل گؤزلوم گؤزه‌للری گؤزله یئنه
قوروق اولان گؤروش یئرین اؤزله یئنه
بیر نئچه گون کوچه‌لری آلسالاردا
های بیدیریق سالسالاردا
بیزی بیزدن آلانمازلار
درین دورو باخیشلارین ناخیشلارین
کؤنلوموزدن یولانمازلار

دوداق دوداق غونچه‌له‌نیر
آرزوموزون قیزیل گولو
لایلا لایلا نغمه‌له‌نیر
آنامیزین دادلی دیلی
آشیر داشیر سئودامیزین سئوگی سئلی

بیزدن بیزی بیرده آیری سالانمازلار
بیزی بیزدن آلانمازلار

بؤلمه لر: ادبیات, شعرلر |

گؤروشلر