EYVAZ TAHA - ایواز طاها
RIZA HƏMRAZ رضا همراز
ƏLIMÜHƏMMƏD BƏYANI علی محمد بیانی
هادی قاراچای- HADI QARAÇAY
« یازیجیلار قاپیسیندا عزراییل/ سید حیدر بیات | آنا یارپاق | کتابخانه آيت الله مرعشي سومين کتابخانه در نوع خود در دنياي اسلام است »
ایواز طاهادان یئنی بیر کیتاب
قیزاران ۲۶, ۱۳۸۷
آلما یولو: آلدیغیمیز خبر لساسیندا ایواز طاهانین «معیار دیل» آدلی کیتابچاسی ایشیق اؤزو گؤردو. بو اثر تیر آیینین اونوندان هلهلیک تبریز، تهران و زنجاندا ساتیشدا اولاجاق. موللیف بو کیتابدا معیار دیلین گئرچکلشمهسینی انگللهین مانعهلری آراشدیریر، بعضی اؤنهریلر ایرهلی سورور. کیچیک حجملی بو کیتابدا آشاغیداکی مؤوضوعلار اینجهلهنیر:
ـ تاريخي سيناقدان قارماقاريشيق يازي آخينلاريناجان
ـ آغيز ديلي و ميللي دوشونوش
ـ معيار ديل و شعريميزين نثره اوستونلويو
ـ يئرلي راديو و تلويزيونلارين جالاق دیلی
ـ اينتئرنئت؛ منفي و مثبت ائتکیلر
ـ معيار ديل و چئشيدلي يازي آخيملاري
ـ گراماتيکايا دؤنوش
ـ بيزده ايصطيلاح يوخسوللوغو وار
کیتابین « اينتئرنئت؛ منفي و مثبت ائتکیلر» باشلیقلی بؤلمهسینده دئییلیر: «مکانا، زامانا و گؤؤدهيه غلبه قازانماق بشرين اسکي ديلهييدير. گؤز قيريپيميندا گونچيخاندان گونباتانا گئتمک، زامانی حرکتدن ساخلاماق و گؤوده [جسم] زيندانيندان آزاد اولاراق روح کيمي گؤيلرده اوچماق. بو، ديريليک سويونو آختارماق کيمي بير شئيدير. اينتئرنئت بيزي بو کؤهنه ديلهيه قووشدورورمو؟ اینتئرنئت زامان مسافهسی و مکان اوچورومو آنلاییشلارینی بایاغی بیر مسئلهیه چئویردی. اینسانلارا تحمیل اولونموش اینفورماسیا قاداغالارینی گؤتوردو؛ دیل، دین و دوشونجه آزادلیغینی گتیردی. آنجاق اينتئرنئتين پروبلئمي اونون ان گؤزهل اؤزهلليييندهير: گؤودهسيزليک. اینتئرنئت گؤودهسيز روحلارين ويرتوال [مجازي] فضاسيدير، بئيينلرين اوزاق انگینلیکلرده دجللیکله قاناد چالماسی. پروبلئم ده بوردان باشلانیر. بوردا بدن هئچ بير تهلوکه دويمادان بيليک قازانير. سانکي ايکيچارخلي [دوچرخه] سورمهيي يالنيز نظري باخيمدان اؤيرهنير. بيلديييميز کيمي، یالنیز نظری بيليک ايکيچارخلي سورمهيه کيفايت ائتمير. چونکي ائله بير آراجي معين بيليک قازانديقان سونرا آرديجيل مينيب ييخيلماقلا اؤيرنمک اولار. بدن تهلوکهيه دوشمهدن اينسان اؤزونون گئرچک فيزيکي دونياسي بارهده يئترينجه تجروبه قازانا بيلمز. اينتئرنئت حاققيندا بئله بير يوزوملار نيچهدن گلمهدير. نيچهيه گؤره، گؤودهلريميزين بو عالمده حسي و شهودي باجاريقلاري دوشونجه آکسياسي اوچون اؤنمليدير. ديل اوچون ده بئلهدير. بو گؤودهسيزليک هم تهلوکهسيز تانينمازليغا گتيريب چيخيارير، هم فايداسيز و دليجه آختاريش خستهلييينه، هم ده قولایلیقلا یالان دانیشماغا. بونلارين هر اوچو ده مسئوليت و عؤهدهلييي ضعيفلهدير. بو شبکهده هم عؤهدهلييه بويون قويماق، هم ده عؤهدهليکدن بويون قاچيرماق قولايليقلا باش وئرير… او بیری یاندان، یالان (=اوبئکتیو قارشیلیغی اولمایان) بیلگینی یایماقلا اینتئرنئت اؤز آیاغینین آلتینی قازیر. بو دا مرکزچیل گوجلره گؤیدن دوشمهدیر. چونکی اونا اسناد وئریلن یالانلار، اونون تؤرهتدییی گئرچک فاجیعهلرله باغلی دوزگون بیلگیلره ده اینامی ایتیریر. یالانچی چوبان جاناوارین علیهینه دوز دانیشاندا دا اینانان اولمایاجاق…»
کیتابی پست واسیطهسی ایله الده ائتمک ایستهینلر ایمئیلیمیزله علاقه ساخلایا بیلرلر.
بؤلمه لر: ادبیات, خبر و تحلیل |