EYVAZ TAHA - ایواز طاها
RIZA HƏMRAZ رضا همراز
ƏLIMÜHƏMMƏD BƏYANI علی محمد بیانی
هادی قاراچای- HADI QARAÇAY
« گرامیداشت حاج قربان سلیمانی در تهران | آنا یارپاق | ایواز طاهادان یئنی بیر کیتاب »
یازیجیلار قاپیسیندا عزراییل/ سید حیدر بیات
قیزاران ۲۴, ۱۳۸۷
اؤلوم هميشه واردير. بير هانسي ديللي شاعرين شعرينين مضمونونو اونوتماميشام
“دوغوم بير اؤلومدور
دوغوم گونوندن باشلانارکن
گون گله بؤيويور”
ايچيميزده بير مثل وار: «آتامين اؤلمهييندن قورخمورام، قورخورام اؤلوم قاپيميزي تانييا» اوشاقليغيمدا بو مثلي دهشت بير دورومدا دوشوندوم. بؤيوک آتام گلدي بيزه، ائويميز ماشين داياناجاغينا ياخينايدي، بير چاي ايچدي، سونرا دئدي دوکتوره گئديرم، خستهيم. دئديم: سنه دئيهجک قاتيق (یوغورت) يئ.
اوندا ايلک اوخول کيتابلاريندا قاتيق و آغارانتی (لبنیات) حاقدا بير شئيلر اوخوموشدوم.
گولومسهدي، سونرا دوروب زنگانا سوغات آپارديغي قاتيق قابيني گؤتوروب ماشين داياناجاغينا دوغرو يولا دوشدو. مينيبوس يوللانيب بؤيوک بابامی زنگانی آپاردی. قاييدان باش مينيبوسدا دئييل اؤزل ماشينلا کنده قاييتدي. داها دميرلي داغلاريندا اونونلا دوغراماج ايچمييهجهايديم، اونون مس آفتاباسي دا سحرلر دستاماز اوچون ايستيسو ايله دولماياجاق ايدي، آراز ائلسس دئميشکن: و داها نهلر، نهلر!!!
چوخ چکمهدي ايکي بيبيم و بير بيبي اوغلوم دا دونيالاريني دئييشديلر. عزرائيل قاپيني نه يامان دا تانيميشدي.
**
دئمک عزراییل ایندی یازارلار قاپیسینی تانیییب و داها ال گؤتورمک ایستهمهییر. چوخدان دئییل، رحمتلي فرزانه اماميهيه تاپشيریلدی، بئله چوخ سورمهمیشدی قافلانتي دا گئتدي، سونرا بهزادي، سردارينيا.
باشقا اؤلکهلرده ده ائله بئله اولدو. نجيب محفوظ –میصیرين دؤردونجو هئرمي- باشلادي. سونرا نازک الملائکه سونرا سئرگون بولوص ايکيسي ده عراقين اونلو شاعيرلري، نئچه گون اؤنجه ده چنگيز آيتماتوو ايله نادر ابراهيمي.
دوغروسو بو انسانلار زامانين اونودوجولوق گوجونو اوندان آليب و اؤز اثرلري ايله ابديلشيبلر. اونلار ديري اولاندا دا ديللري ايله دئييل يازيلاري ايله دانيشيرديلار. بو باخيمدان بلکه ده اؤلوملرينه راحاتسيز اولماق يئرسيزدير.
اما ائله بو قدر کي نجيب محفوظ و چنگيز آيتماتوو کيمي انسانلار عين گؤيون آلتيندا داها نفس چکمهييرلر، سن باخان گونشه باخمايير، سن يئريين يئر کورهسي اوستونده يئريمهييرلر، مسئلهني چتينلشديرير.
دونيا بو آداملارين گئتمهسي ايله داريخديريجي اولور. اولسون کي من هئچ زامان آيتماتوو ايله گؤروشوب دانيشا بيلمهيهجهايديم.
يازيدان سونرا:
ايللر اؤنجه بير عربجه شعر، ائله اورهييمه ياتدي کي. سونرالار گؤردوم ايرج ميرزا دا بو شعري بهيهنيب، بير شعرينين ايچينده عينا اونو عربجه گتيريبدير. شعر بو ايدي:
الا موت يباع فاشتَريه
و هذا العيش ما لاخيرَ فيه
اؤلوم ساتان يوخ مو؟
آليرام
بو حيات
هئچ نهيه ياراماز.
بؤلمه لر: ادبیات, گوندهلیک یازیلار/ یادداشتها |
قیزاران ۲۵-ي, ۱۳۸۷ چاغ ۹:۴۲ آ.خ
آنار`ين دا بئله بير سؤزو واردي: بير اينسان اؤله نده، او مو دونياني ايتيرير، دونيا مي اونو؟
قیزاران ۲۶-ي, ۱۳۸۷ چاغ ۱:۳۰ گ.ؤ
[…] یازیجیلار قاپیسیندا عزراییل/ سید حیدر بیات […]