EYVAZ TAHA - ایواز طاها
RIZA HƏMRAZ رضا همراز
ƏLIMÜHƏMMƏD BƏYANI علی محمد بیانی
هادی قاراچای- HADI QARAÇAY
« پراکندگی ترکان ایران | آنا یارپاق | تيليمسيزميشم / سید حیدر بیات »
ادعا سيز و چاليشقان آراشديريجي و شاعير رضا همراز / محمد الفت
گولن آی ۱۱, ۱۳۸۷
باشقا بير يئر دن گليرم
بير قوجاق ايشيق
بير قوجاق اولوم
بيچميشم
ايشيغي سيزه
اولومو اوزومه
گتيرميشم
«والي گؤزهتن»
بير سون باهار بيتيشنده؛ سويوق بير قيش باشلاناندا، رحمتلي پروفسور محمد تقي زهتابي ني تورپاغا تاپيشيراركن اؤز – اؤزومله سوروشوردوم بئله بير نهنگ و داهي اينسانين يئريني كيم دولدوراجاق؟
پروفسور حميد محمد زاده – دونيادان گئدن زامان و هابئله آخيملي نثري اولان شيرين قلملي يازاريميز ائل فرزانهسي عومور چيراغي سونن گونلر؛ تبريزين او قارلي گونلري وادي رحمت قويلاغيندا بو اولو انساني؛ شاغير اسماعيل مددي دئميشكن ( بير توخوم كيمي يئره اكنده) يئنه هامان سورغو ( بس بو بويوك اينسانين يئرين كيم توتاجاق؟ دئيه بئينيمه تاخيلدي .
آذربايجانيميزين كؤكلو كولتور و مدنيت آغاجيندان بو يارپاقلار يئره النديكده (بو يارپاقلارين يئرينه هانسي ياشيل يارپاقلار بيتهجك ) فيكير ايله دولاشيرديم و ياشيل يارپاقلاري آختاريرديم .
۱۵ ايل اؤنجه تبريزين بؤيوك فابريكالارينين بيرينده ايشه باشلاركن بوفابريكادا ۴۵۰۰ ايشچي ايشه مشغول اولموشلار، فابريكانين بؤيوك كيتابخاناسي اولدوغونو ياخشي بيليرديم؛ بو كيتابخانادا بير ادعا سيز هابئله سسسيز سميرسيز عين حالدا چاليشقان اينسان هر گون اونلار كيتابلار ايچينده ياشاماغا مشغول اولوردو. من هر گون او كيتاب ائوينه باش چكيب حورمتلي مسئولوندان آرايیب – آختارديغيم كيتابلاري آليب اوخويوردوم .نظره آلين ۷۳-جي ايللرده بؤيوك فابريكانين كيتاب ائوينده بير چوخ آذربايجان تاريخ و مدنيتيته عايد اثرلر بو انسانين چاليشماسي و چكديیي زحمت لر نتيجهسينده بير يئره توپلانيب آذربايجان ادبيات و تاريخ وورغونلارينين يانغين اورك لرين سيراب ائله ييردي.
اورهگي آذربايجان هوسي ايله چيرپينان بو گؤزل انسان فابريكانين ايشچيلرينين اوركلرينی اؤز تواضع كار خيصلتلري ايله فتح ائتميشدير .بو گون داها چوخ آذربايجان شوناسليق قونوسوندا اولان كيتابلار و هابئله آذربايجان ادبيات تاريخ و فولكولورونا عايد ديرلي اثرلر بوتون ايشچيلرين ائولهرينه يول آچميشدي.
بوتون آذربايجان خاديم لريني اورادا بولماق اولاردي. علي تبريزلي، پروفسور زهتابي، پروفسور فرزانه. دوقتور هيئت، دوقتور حسين صديق؛ اوستاد رحيم رئيس نيا؛ اوستاد عبدالحسين ناهيد و بير چوخلارينين خالق ائتديگي اثرلر زنگينلشميش بير كيتاب ائويني يارادميشدير.
بو گؤزل اينسان كيتابخاناني اداره ائده كن اصلاحات دؤورونون ياراتديغي نسبي فضادا آذربايجان مطبوعاتينين اوجاغينين قيزديرانلاريندان بيري ده اولموشلار. يعني اؤزلري يانيب خالقا ايستي وئرميشلر.
بئلنچي دورومدا چوخلو قزئتهلر ياراندي . اونلارين پارلاقلاريندان بيريسي بلكه ده بيرينجيسي شمس تبريز هفته ليگينده بو اينسانين بؤيوك رولو اولموشدور .
شمس تبريز آذربايجان خالقينين ميللي شعورونون گليشمهسينده نه قدر دَيري و سهمي اولورسا بو چاليشقان اينسانين ديري و پايي بو هفته ليگين يارانماسيندا و آياق توتماسيندا اوقدر اولابيلميشدير . بو قزئته بوتون (دووارلارا قارشي) اؤزونو جانلي ساخلاديغيندا بو دَيرلي اينسانين رولو و پايي دانيلمازدير . اونون و بير نئچه امكداشينين اصلاحات دؤورونده سياستچيلر آراسيندا اولان قدرت و گوج ياريشمالاريندا قوربانليق اولان آذربايجان دا آذربايجانلينين سسي كسيلدي و سوسماغا مجبور اولدو !
آما قارانليغا لعنت ائدن دوستلار شمعلريني يانديرديلار. او شمعلري يانديرانلارين بيريسي ده همان فابريكانين كيتابخاناسيني جانلي ساخلايان ، قزئتهلر اوجاغيني آليشديران؛ ديرلي مقالهلر ياراديجيسي سئويملي شاعير و آراشديريجيميز رضا همراز اولموشدور.
رضا پروفسور زهتابي و پروفسور فرزانه و پروفسور حميد محمدزاده و نه بيليم بو كيمي نهنگ عاليم لريميزين مكتب لرينين ان پارلاق اؤيرنجيلريندن بيريسيدير . رضا بوگون او بؤيوك ضياليلارين هامارلاديغي يولون يولچوسودور. من امينم كي او بؤيوك لرين يئرين دولدوران اينسانلاردان بيريسي دير.
۱۶ ايله ياخين دير من رضا همراز لا ايش بير ليك آپاريريق. اونو بير آن دايانمادان دفعهلر چاليشمالارينين شاهدي اولموشام. گؤزل مضمونلو شعر لري ايله ياشاميشام. دَيرلي و تاي سيز مقالهلر ايله آذربايجانيميزي داها دا آرتيق تانيميشام. بير چوخ لاريني قلمله تانيشديريب يازماغا تشويق ائتمهسيني گورموشم. نئچه نئچه گوجلو قزئتهنين يارانماسيندا و زنگين يازيلارلا بارلانماسيندا ياخيندان دويموشام .نئچه قزئته ده سردبير رولونو نئجه ده گؤزل باشاريجيسي اولموشدور .آنجاق همشه كيمي آدينين رئكلاميندان چكينميشدير .
بونو دا دئمهلييم كي تبريزده بارماق سايي قدر ائو كيتابخاناسي اولورسا شوبههسيز اونلارين بيري رضايا عايد دير. رضا همرازين اورهيي بويدا بير كيتابخاناسي وار. چوخ زنگين و قيمتلي. او، قازانديغينی كيتابا تبديل ائديب ياخيب كيتاب ائوينه.
رضا همرازين بؤيوك و شخصي كيتابخاناسي بوتون آذربايجان يازارلارينين اوزونه همهشه آچيق اولوب چوخلارينين اورايا گليب تدقيقاتي ايشلرينده او زنگين كيتاب ائوينده اَيلهشيب او خزينهدن اولدوقجا فايدالانيبلار. آذربايجان تاريخينه حصر اولونموش اوزل قايناقلار – ادبيات ساحه سينده هابئله مشروطه قونوسوندا دولغون بير خزينه ياتيب او كيتابخانادا.
رضا همراز اؤزو « آذربايجان و رجال قونوسوندا» بير جانلي انسيكلوپديادير. چوخلو اونيوريسته اويرنجيلري ، ليسانس و يوكسك ليسانس تئزلرينين ايشلرينده رضا همرازا مراجعت ائديب؛ اونون بيلگيلريندن و هابئله زنگين كيتابخاناسيندان فايدالانارلار.
توپلوموموزون چتين اقتصادي شرايطينده بير چوخ آدام شخصي منفعتلر داليسيندا بير بيرلرين آياقلار آلتيندا باسانلارين سايي چوخ اولسا دا رضا همراز كيمي ساده ياشايششيندا قازانديغيني كيتابا وئريب و اونو بوتون كيتاب سئورلره فرهنگ و مدنيت قورويان اينسانلارا اتحاف ائدن اولسادا آما همشه بئلنچي اينسانلارين منفعت طلب اينسانلارا پيروز اولماغين تاريخ ثبوته يئتيرميشدير .
البته بو يولدا اونا بويوك يارديمچي و كؤمكچي و داها دوغروسو رضاني رضا همراز ائدن اونون نجيب و وقارلي عومور و حايات يولداشينين نقشي هئچ ده آز اولماميشدير. بير زامان گلجك تاريخ؛ آذربايجان قزئتهچيليك اوغروندا زحمتي كئچنلر و تورك كولتورنده بو قزئتهلرين اوجاغيني ايستي ساخلايانلارين آديني چكنده اينانيرام رضا همرازين آدي يقين كي اؤن سيرالاردا دوراجاقدير. بو بويوك اينسانا يولون آچيق اولسون دئيه نئچه پارچا شعرينه سيزي قوناق ائديره م.
۶/۲/۸۷
ارك
اركه باخاندا
بوركوم باشيمدان دوشور
تاريخينه باخاندا
اليمي آلنيما قويورام
بوگونونه باخاندا
هئي
بير اليم اوره يمده
بوبيريسين گوزومه قويورام
۱/۵/۸۶
گؤي مچيد
گؤي مسجيدي گورنده، گووهنيرهم اؤزومه
آغ قويونلولار؛ قاراقويونلولار
بير سينما پرده سي تك گؤز اونومدن كئچيرلر
آنجاق اورادا گزنده؛ آياغيمي يئر اوزونه قوياندا
حئييفيم گلير تورپاغا
آخ بيليرسيز
من گزديیيم تاريخ اوردا گيزلهنيب
۱/۵/۸۶
بؤيوك سمفونو
دنيز، دنيز بويوك بير سمفونيا
گميلرين شاپيلديسي
شپهلرين قايالارا اؤزلريني چيرپمالاري
ساحيللره اؤزلريني سرمهلري
گؤزهلجه قوشلارين
دويغودان لپهلهنن نغمهلري؛ سسلري
باليقچيلارين هاي لاري – كوي لاري
«تور دولدو تاريم اولدو – قايغيم ياريم اولدو »
سونالارين حزين – حزين آغلاييشي
آه دنيز؛ دنيز
بويوك بير سمفونيا
سومسوك ايت
داش دوشسون باشينا كولباش سومسوك ايت
نيچون تكليكينده سئوَللهنيرسن
بو چؤلو بو باييري
باخ
آجيندان قارنينين نازيك دريسي
قابير قاوا ياپيشيب
سن كيميلر قهرمانجا تكليكده
يوزلر داوار قورويور
داش دوشسون باشينا كولباش سومسوك ايت
باخ اؤيرهن ياشاماغي باري تايیندان
نصيحت
غريبهدير
بير بارماغين اوستومه توتسا دا
حله دورد بارماغي اوزو بيلمهدن اؤزونه نصيحت وئرير
غريبهدير
اؤز گؤزونده بير ديرهيي گؤرمهدن
كيميسينين گؤزونده
بيرجه چوپو تئز سئچير
۲۰/۱/۸۷
اولولر
اولولرين بير سيراسي دئييرلر
هئي يئريز بوش!
سانكي بوردا گونوموز بارات گئجهسي دير!
اما
اولولرين بير سيراسي دئييرلر
آمانين بير گونو دور
اؤلمك ده كي حالوا پايلامير لار
هرنهديرسه
يئرين اوزو آلتيندان يئيدير
۲۰/۱/۸۷
يئنه دردلي ارك
باخيرديم
ارك-ين كؤلگهسي
اوجا تبريزين كوچهلرينه دوشدو
رسام؛ اركي قوجا تبريزده چكمك ايستهييردي
يازيق رسام
هانسي كوچهلرده
۱/۵/۸۶
قوجا ليق
بير قوجادان سوروشدولار
قوجا عمي سونكو آرزين نه دير سنين؟
او قوجا نين ايكي گؤزو ياشلا دولوب بئله دئدي
- ديلهييرهم اوشاق اولوب اوشاقلارلا گيزلانپانجي قيزيشديرام
اويناياركن اونلار يوموب گؤزلريني من گيزلَنم
او يئرده كي داي قوجاليق تاپانمايا بيرده مني
بؤلمه لر: ادبیات, تاریخ, شعرلر |