EYVAZ TAHA - ایواز طاها
RIZA HƏMRAZ رضا همراز
ƏLIMÜHƏMMƏD BƏYANI علی محمد بیانی
هادی قاراچای- HADI QARAÇAY
« بختیار وهابزادهنین حیاتینا قیسا باخیش | آنا یارپاق | زنداني شهرشتاني! / علی محمد بیانی »
سو پريسي / گولزار ابراهيماووا
زومار آیي ۴, ۱۳۸۶
بيري واردي، بيري يوخدو، اوجو-بوجاغي گؤرونمهيهن بؤيوک بير دنيز واردي. بو دنيز بوتون دنيزلردن چوخ-چوخ گؤزل ايدي. دنيزين ان درين يئرلرينده بئله سويون شفافليغيندان دنيزين ديبي گؤرونوردو. اونون ساحيللري و درينليکلري يامياشيل بيتکيلرله احاطه اولوندوغوندان دنيزين ده رنگي ياشيل ايدي. ائله بونا گؤره ده دنيزين آدينا ياشيل دنيز دئيرديلر. جاماعات آراسيندا بو دنيزه سِحرلي دنيز ده دئينلر وار ايدي. اونا گؤره بئله دئييرديلر کي، هله بو دنيزده ايندييه قدر هئچ کس بوغولماميشدي. لاپ اوزه بيلمهيهن آدام دا تصادوفن دنيزه دوشسيدي، هوشونو ايتيرر و اؤزونه گلنده اؤزونو ساحیلده گؤرردي. بو هامي اوچون آچيلماز بير سيرر اولاراق قالميشدي. ياشيل دنيزين اسرارنگيز گؤزلليگي و سِحرلي اولماسي هامينين ديقتيني جلب ائديردي. اونون شؤهرتي بوتون دونيايا ياييلميشدي. اوزاق-اوزاق اؤلکهلردن دؤولتلي سياحلار گليب بو دنيزين و اونون ساحیللرينين گؤزلليگيني سئير ائدير، ذؤوق آليرديلار. بورادا اولان باليقلار دونيانين هئچ بير دنيزينده يوخ ايدي. بيري-بيريندن گؤزل و بؤيوک کؤپک باليقلاري، نره، دورنا، قولاقلي خانيلار، چؤکه باليقلاري، ايلان باليقلاري، دنيز شئيطاني آدلانان باليقلار و جوربجور باشقا باليقلار بو دنيزده سايسيز-حسابسيز ايدي. سويون ايچريسينه گيرن کيمي باليقلار آدامدان قورخمادان اونون آياقلارينا سورتوشرک اوزوردولر. آما سِحرلي دنيزدن باليق توتماق، گئديب گؤيدن اولدوز گتيرمک کيمي بير شئي ايدي. باليق توتماغا حاضيرلاشان باليقچيلارين بوتون زحمتلري هدر گئدر، تورو چکنده گؤررديلر کي، تور کسيک-کسيک اولوب و بوتون تورا دوشن باليقلار اوزوب جانلاريني قورتاريبلار. بلکه ده بعضي باليقچيلار قارماقلا بير-ايکي باليق توتارديلار. بو چوخ دا قورخولو دئييلدي. واي او گوندن کي، همين آدام بير آز چوخ باليق توتايدي. اوندا دنيزده بير دالغالار عمله گليردي کي، آز قاليردي قاييق، ياخود دا گمي چئوريله.
سِحرلي دنيزين بير ده چوخ غريبه يازيلماميش قانونو وار ايدي. دنيزه چوخ ياخين يئرده کوما قورماق، ائو تيکمک اولمازدي. بو هامييا بللي ايدي. اونا گؤره ده هئچ کس بونا چاليشميردي. هامي بيليردي کي، کيم اورادا بير تيکيلي تيکسه، ياخود عادي باليقچي تورلاري آسسا، او ساعات دنيزده بؤيوک-بؤيوک دالغالار عمله گلهجک و همين آندا دالغالار همين شئيلري داغيداجاقلار. باش بيلنلر دانيشيرديلار کي، دنيز سولطاني اؤز باليقلارينين دنيزده قورخوسوز اوزمهلري اوچون بئله ائدير. 
ياشيل دنيزه ياخين اولان بير اوبادا شاهنور آديندا بير جاوان اوغلان ياشاييردي. شاهنور ننهسي ايله بير يئرده قالير، قوجا ننهسينه هر ايشده کؤمک ائديردي. او، دنيز قيراغيندان باليققولاغيلار ييغير و اونلاردان جوربجور ناخيشلي بزک اشيالاري دوزلدير، سونرا دا ساتاراق ننه سي ايله دولانيردي. هر دفعه ده او باليققولاغي ييغماق اوچون ساحیله گلنده دنيز لپهلري اونا ساحیلده اولمايان بيري-بيريندن گؤزل باليققولاغيلار گتيريردي. شاهنور بو حاقدا هئچ کسه بير سؤز دئمه ميشدي، قورخوردو کي، اينانماسينلار، اونو لاغا قويسونلار. بيري-بيريندن گؤزل باليققولاغيلاريندان دوزلديلميش بزک شئيلريني قيزلار، گلينلر چوخ بؤيوک هوسله آليرديلار. شاهنور و ننه سي نين گوذراني گئت-گئده ياخشيلاشيردي.
بونونلا بئله شاهنورا دنيزين سيرلري راحاتليق وئرميردي. او، اورگينده بوتون گونو گؤتور-قوي ائدير، اؤزو-اؤزونه جوربجور سواللار وئرير و هئچ بيرينه جاواب تاپا بيلميردي. ” گؤره سن، دنيزده بوغولاني کيم خيلاص ائدير؟ باليقچي تورلاريني کيم دئشير، باليقلاري خيلاص ائدير؟ ساحیلده ائو تيکنده، نييه دنيزده کي دالغالار همين ائوي تيکمهيه ايمکان وئرمير؟ بوتون بونلارا کيم امر وئرير و اونو کيم يئرينه يئتيرير؟ هانسي قوووه دنيزده کي باليقلاري دايما قورويور؟ ” بوتون بو سواللار گئجه ده، گوندوز ده شاهنورا راحاتليق وئرميردي.
بئلجه، بيکئف گزديگي گونلرين بيرينده، شاهنور بو سيررين آچيلماسي يولونو فيکيرلشيب تاپدي. اؤزو-اؤزلوگونده سئوينجک اولدو. او، قرارا گلدي کي، دنيزين ايچريسينده سويا آتيلسين و اؤزونو ائله گؤسترسين کي، گويا بوغولور. اوندان سونرا بوتون بوغولانلاري خيلاص ائدن کيمديسه، يقين اونو دا خيلاص ائدهجک. هئچ اولماسا اونو گؤرسه، بيلر کي، قالان ايشلر ده اونا مخصوصدور.
بئله فيکيرله گلدي قاييغي اولان بير تانيشي نين يانينا. دئدي کي، دنيزه چيخير، اونا قاييق لازيمدير. همين آدام دا شاهنورو ياخشي تانيديغيندان، اونا اعتيراض ائلهمه دي.
شاهنور ائله همين ساعات گليب ننه سي ايله اؤپوشوب گؤروشدو. ننه نه قدر هارايلاديسا، هارا گئديرسن، اوغلان هئچ نه دئمه دي. قاييقلا چيخدي دنيزه. دنيزدن بير خئيلي آرالانميشدي کي، آتيلدي سويا چيممهيه. چيميب قورتاراندان سونرا گويا کي، قاييغا قالخماق ايستهينده قاييغي بيله-بيله چئويردي. بير خئيلي سويون ايچريسينده اللريني يوخاري قالديريب ” کؤمک ائلهیين، بوغولورام ” -دئيه قيشقيردي. بوندان سونرا ايسه حرکتسيز حالدا ياواش-ياواش سويون ديبينه دوشمهيه باشلادي. گؤزلريني ده يومدو کي، قيراقدان اونا فيکير وئرن اولسا گؤرسون کي، بوغولان آدام هوشونو ايتيريب. بير خئيلي بئله قالاندان سونرا شاهنور آز قالدي کي، دوغرودان دا بوغولسون. بو واخت کيم ايسه اونون بورنوندان توتدو و آغزيندان اونا نفس وئره-وئره، اوزهرک ساحیله دوغرو آپاردي. شاهنور گؤزونون بيريني قورخا-قورخا آزجا آچدي. او، قورخدو کي، فيريلداغي نين اوستو آچيلار، اونو خيلاص ائدن بو دفعه دوغرودان بوغار. ياخشي گؤره بيلمه ديگيندن اولجه، ائله بيلدي کي، بو گؤزل بير بالیقدير. اونون گؤزلليگيني گؤرمک اوچون گؤزلريني گئنيش آچدي. 
کاش کي، شاهنور اوندا گؤزلريني هئچ آچمايايدي و ايلاهي نين ياراتديغي بو نادير گؤزلليگي گؤرمه يهايدي. اونو خيلاص ائدن دونيانين ان گؤزل قيزي ايدي. بدنيندن ده اوزون قيوريم ساري ساچلاري، دنيز کيمي يامياشيل گؤزلري، سود کيمي آغاپپاق بدني گؤزلليکلر ايچينده ايتميشدي. آما گؤزهلين بدني ياريدان آشاغي باليق ايدي. شاهنور باشا دوشدو کي، بو سو پريسيدير. آما قيز سو پريسي اولسا دا، شاهنورون عاغليني باشيندان چيخارتميشدي. شاهنور سو پريسي نين يانيندا هئچ اولماسا بير آز آرتيق قالماقدان اؤترو پريني برک-برک قوجاقلاميشدي. سو پريسي اوغلاني سودان چيخاريب ساحیله قويماق ايستهدي. آما اونا زالي کيمي ياپيشديغيني گؤرنده، آرتيق اؤز سيرري نين آچيلديغيني باشا دوشدو. پري اؤز گؤزل، سو کيمي آخار سسي ايله شاهنورا دئدي:
- ايگيد، سن بيرينجي اينسانسان کي، منيم سيرريمي اؤيرندين. ايستهیيني دئ، من يئرينه يئتيرمه يه حاضيرام، آما منيم سيرريمي هئچ کسه آچما.
شاهنور پري نين گؤزلليگينه وورولموش، اونون دانيشيغينا حئيران اولموشدو. او، هاننان-گئجدن اؤزونه گليب پرييه جاواب وئردي:
-گؤزل پري، من سنه سؤز وئريرم کي، من سنين سيرريني هئچ کسه آچمارام. آما سن ده گل مني سنين گؤزلليگيني گؤرمکدن محروم ائلمه. هئچ اولماسا هردن گليم، سنين بو فوسونکار گؤزلليیيني بيرجه دفعه گؤروم، چيخيم گئديم.
سو پريسي “گؤز اوسته ” دئييب دالغالارين آراسيندا گؤزدن ايتدي. او دا شاهنورلا گؤروشوندن سونرا ائله بيل کي، سودا اوزمور، گؤيده اوچوردو. اؤزونو چوخ بختييار حيسس ائديردي. دنيز سلطنتينه چاتيب، آتاسي نين تاختي-تاجي اطرافيندا اوزه-اوزه بير نئچه دفعه فيرلاندي. سولار شاهي قيزينداکي بو دييشيکليگي همين آن حيسس ائله دي. سببيني سوروشدو. دنيز سلطنتينده هئچ کس هئچ بير واخت يالان دانيشمازدي. اونا گؤره ده سو پريسي اولانلاري آتاسينا اولدوغو کيمي دانيشدي. آتاسي نين چوخ غمگين اولدوغونو گؤرن پري ناراحات اولدو:
- بؤيوک سولطان! بلکه من نه ايسه سهو ائتميشم. يول گؤستر، من سهويمي دوزلتمه يه حاضيرام.
آتا فيکيرلي-فيکيرلي جاواب وئردي:
- منيم عاغيللي قيزيم، من سنه هميشه اؤيود-نصيحت وئرميشم کي، سن هميشه قورودا ياشايان اينسانلارا ياخشيليق ائت، آما اونلاردان اوزاق گز. سن بو واختا قدر چوخ باليقلاري اينسان توروندان خيلاص ائتميسن. آما بو گون اؤزون اونلارين تورونا دوشموسن. 
- آتا، سن يانليش فيکيرلشيرسن، -دئيه پري آتاسيني ساکيتلشديردي، -من هئچ کسين تورونا دوشمهميشم. هميشه کي کيمي آزادام و اؤز دنيزيميزي هميشه قوروماغا حاضيرام. هئچ کس منه مانع اولا بيلمز.
سولار شاهي باشيني معنالي-معنالي بولاييب، دريندن آه چکدي و دوغما پريسينه بالاجا بير باليققولاغي وئرهرک دئدي:
- آل بو باليققولاغيني، نه واخت اينسانلار سنه پيسليک ائتمک ايستسه، اونو اوفله يهرسن، من همين آن سنين کؤمگينه گله جگم.
سو پريسي آتاسي نين وئرديگي باليققولاغيني، اونون خاطرينه ديمه سين دئيه، بوينوندان آسدي. آما اصلینده ايسه او، اينسانلاردان هئچ واخت پيسليک گؤزلميردي.
او، شاهنورا سؤز وئرديگينه باخماياراق بير نئچه گون ساحیله گئتمهدي. آما آخيردا حس ائله دي کي، اؤزو ده اوغلاني گؤرمکدن اؤترو داريخير. اوزه-اوزه ساحیله گلدي. گؤردو شاهنور بيکئف-بيکئف اوتوروب ساحیلده، گؤزلري يول چکير. بو بير نئچه گونده او، چوخ آريقلاميشدي. سويون ايچريسيندن اونا طرف اوزن سو پريسيني گؤرنده سئوينجيندن گؤزلري ياشاردي. اونلار بئلجه دوستلاشديلار.
شاهنور هر گون دنيزين قيراغينا گلير، سو پريسي ايله گؤروشوردو. اونلار شيرين-شيرين صؤحبت ائدير، شاهنور پرييه قورو حياتدا باش وئرنلردن، پري ده اونا سو آلتيندا باش وئرن حاديثه لردن دانيشيردي. اونلار بير-بيرلري نين دانيشيقلاريندان دويموردولار.
پري سؤز آراس آتاسي نين اينسانلاردان قورخدوغونو دئدي. آما شاهنور پرييه باشا سالدي کي، بو هئچ ده بئله دئييل، دونيادا ان خئييرخاه مخلوق اينسانلاردير. اونلار هامييا کؤمک ائتمه يه چاليشيرلار. بو واخت سو پريسينده اينسانلارلا بير يئرده ياشاماق آرزوسو اوياندي. او، بو فيکريني شاهنورا آچيب دئدي. شاهنور اونا دئدي:
- آخي سن ياريدان آشاغي باليقسان، سن قورودا نئجه ياشايا بيلرسن؟
سو پريسي بونو ائشيدنده ياواش-ياواش سودان چيخماغا باشلادي. او، سودان قورويا چيخديقجا بدني اينسان بدنينه چئوريلير و پري نين گؤزلليگي داها دا چوخاليردي.
شاهنور بو گؤزلليک قارشيسيندا ائله بيل گؤيلرده اوچوردو. آما اينسان آراسينا چيخماميش بو قيزي بيردن-بيره پالتارسيز جاماعاتين آراسينا چيخارماق اولمازدي. جاماعات اونو داشا باساردي. شاهنور اولجه قيزا پالتار آليب گتيرمه لييدي. بونا گؤره ده او، قيزا هر شئيي باشا ساليب دئدي:
- سن منيمله بير يئرده اولسان دونيانين ان خوشبختي اولارام. آما بيزيم اؤز قايدا-قانونوموز وار. سن اَينينه پالتار گئيمه ليسن. بونون اوچون من بازاردان سنه اَيين-باش آلمالييام. ايذن وئر، هم گئديم سنه پالتاردان-زاددان آليم، بازارليق ائديم، هم ده ائو-ائشيگي ساهمانا ساليم کي، سن اورادا راحات ياشايا بيله سن. دوز اوچ گوندن سونرا سحر ائرته سني بورادا گؤزليه جگم.
اونلار دانيشيب، گؤروشوب آيريلديلار.
ايندي سيزه کيمدن دانيشيم، کيمدن خبر وئريم، شاهنورون اکيز قارداشي اولان ماهنوردان. آما قارداشلارين بيري-بيرلريندن خبرلري يوخ ايدي.
ماهنورلا شاهنور آنادان اولاندا آنالاري اوشاقلارين اکيز اولماسينا چوخ تأسوفلنميشدي. او، قورخوردو کي، گله جکده ايکي قارداش بير-بيرينه تاخت-تاج اوستونده دوشمن اولالار. بونا گؤره ده اوشاقلار آنادان اولان کيمي خلوتجه اونلاردان بيريني گؤتوردو هئچ کيمه بير سؤز دئمه دن، ساخلاماق اوچون اونو ياخشي تانيديغي بير آروادا وئردي. همين آرواد دا ايندي شاهنورون ننه سي ساييليردي.
هميشه شاهنور ننه سيندن آتا-آناسي حاقدا بير شئي سوروشاندا ننه سي اونا دئيردي کي، تلسمه، واخت گلر، هر شئيي اؤزون بيلرسن.
ماهنور ايسه شاه آتاسي نين غدار خاصيتلريني گؤتوره-گؤتوره بؤيوموش، آتاسي اؤلندن سونرا ايسه تاختي-تاجا صاحيب اولموشدو. جاوان اولماسينا باخماياراق آرتيق اوچ دفعه ائولنميشدي. اونون اوچ گؤزل آروادي وار ايدي. او، رعيتي نين قايغيسينا قالماقدان چوخ گزمگي، کئف چکمگي اوستون توتاردي. 
بو گون ده بئله گونلردن بيري ايدي. شاه نشئهلنميش و ياخين سايديغي آداملاردان بير نئچه سيني گؤتوروب، ياشيل دنيزه سياحته گلميشدي ايکي گون ايدي کي، ياشيل سولارين آراسيندا سياحت ائدير، چاليب اويناييرديلار. شاه ايچکيدن باشي دومانلي حالدا لپلره، اونلارين آي ايشيغيندان برق وورماغينا تاماشا ائديردي. گميده کي لر هاميسي کئفلنميش و ياتميشديلار. تکجه شاه اؤزو اوياق ايدي. بيردن لپهلرين آراسيندان بير گؤزل قيز باشيني چيخاريب شاها گولومسوندو. ماهنور شاه ائله بيلدي کي، کئفليدير، گؤزونه قارا گؤرونور. تئز اووجونو سو ايله دولدوروب، ووردو اوزونه. آما همين قيز سولارين آراسيندان اونا باخيب گولور و نه ايسه دئييردي. قيزين گؤزلليگي شاهي لاپ چاشديرميشدي. بير ايسته دي قيشقيرسين، هاميني اوياتسين، سونرا فيکريندن واز کئچدي. فيکيرلشدي کي، بو لاپ يوخو دا اولسا چوخ ماراقلي يوخودور. بئله يوخودان اويانماق دا دوزگون دئييل. يوخ، اگر بو روحدورسا، عئيبي يوخ، قوي مني ده اؤزو ايله هارا ايسته يير، آپارسين.
بو فيکيرلرله شاه اليني قيزا اوزاتدي. سو پريسي اکيز قارداشلاري سهو سالميشدي دئيه، اليني اوزاتدي ماهنورا. ماهنور اونو سودان چکيب چيخارتدي. تئز اونا اَينينه گئيمه يه پالتار تاپيب وئردي. کيشي پالتاري اولسا دا قيزين پالتاردان باشي چيخماديغيندان اونو تعريفله دي:
- شاهنور، سن منه نئجه قشنگ پالتار آلميسان. آما من هئچ بيلميرديم سن بئله تئز مني آختارماغا گه لرسن. سن نه تئز قاييتدين؟
آما قيز نه سوروشوردوسا، شاه هئچ بيرينه دوزگون جاواب وئرميردي. سو پريسي چوخ عاغيللي ايدي. او، بوتون بونلاردان بير آز شوبههلندي. ماهنور باشا دوشدو کي، قيز اونو کيمينله ايسه، شاهنور آدلي بير اوغلانلا دييشيک ساليب. آما هر شئي اولدوغو کيمي قالسين دئيه، او سوسدو و هئچ نه دانيشمادي. شاه باشا دوشدو کي، بو قيز سو پريسيدير. بيرجه اونو قيزا تاپشيردي کي، بو حاقدا هئچ کسه بير سؤز دئمه سين.
ماهنور قيزي سارايا گتيردي. او، قيزدان خلوتي بوتون شهره هاي سالديريب شاهنور آدلي نئچه نفر وارديسا، اونلاري توتدوروب سارايا گتيزديردي. هاميسيني بيرجه-بيرجه دانيشديردي. دوغما قارداشي شاهنور گتيريلنده ايسه او امين اولدو کي، اونون اکيز قارداشيدير. شاهنورون دا گؤزلري کلله سينه چيخدي. اونلار شاهلا بير-بيرلرينه نئجه ده اوخشاييرديلار؟ ايسته دي بير سؤز دئسين، جورأت ائلمه دي.
ماهنور شاه اؤز آناسيني يانينا چاغيرتديردي و اؤيرندي کي، حقيقتن ده شاهنور اونون اکيز قارداشيدير. شاهنوردان دا اؤيرندي کي، اونون سو پريسي سئوگيليسي وار. اولجه، شاهنور آچيغيني دئمک ايستمهدي. ماهنور اونا دوغما قارداش اولدوغونو دئيندن سونرا شاهنور هر شئيي آچيب شاه قارداشينا سؤيله دي. او، اؤزونو خوشبخت ساييردي. بير طرفدن سو پريسي کيمي سئوگيليسي وار ايدي، ديگر طرفدن شاه قارداشي اولدوغونو اؤيرنميشدي.
بوتون بونلاردان سونرا ماهنور شاه هئچ کسه بير سؤز دئمه دن وزیره امر ائتدي کي، شاهنورو ان گيزلي زيندانلاردان بيرينده ساخلاسين. و بو باره ده هئچ کسه بير سؤز دئمه سين. اؤزو ايسه بوتون ساراي اهلينه تاپشيردي کي، توي تداروکو گؤرسونلر.
سحريسي گون بوتون شهره ياييلدي کي، شاهنور گئجه ايله يوخا چيخيب.
سارايدا ايسه شاه سو پريسي نين اوتاغيندان هئچ بير يانا چيخمير، بوتون گونو اونا تاماشا ائديردي. شاهين آروادلاري بوندان يامان غضبلنميشديلر. اونلار مقام آختاريرديلار کي، قيزين اوستونه جوموب اونو دؤيسونلر. شاهنورون ننه سي يئر قالماميشدي کي، گزيب شاهنورو آختارماسين. آخيردا علاجي کسيلدي، گلدي شاهنورون دوغما آناسيندان اوغلونون يئريني سوروشماغا. دوزدو، آنا اوغلونون يئريني دئيه بيلمه دي، آما باشا دوشدو کي، بو اونون غدار اوغلو ماهنورون ايشيدير. دوز گئتدي ماهنورون يانينا. اوندان شاهنورون يئريني سوروشدو. ماهنور آند-آمان ائله دي کي، اونون بوندان خبري يوخدور. آما آناسي اونا اينانمادي. گئديب ساکيت اوتوردو يئرينده، باشلادي فيکيرلشمهيه. فيکرينه گلدي کي، بلکه ماهنور اونو اؤلدورتدوروب؟ اؤزونه يئر تاپا بيلمه دي. دوروب ماهنورون گتيرديگي قيزين - سو پريسي نين يانينا گئتدي. دئدي، بلکه، بو قيز نه ايسه بيلر.
ماهنور توي مراسيمينه باشي قاريشميشدي دئيه، قيزين يانيندا يوخ ايدي. شاه آناسي قيزين يانينا گليب، اؤزونو گلينه تانيتدي. گلين سئوينجک اونون اليندن اؤپوب، - ” شاهنورون نئجه نوراني آناسي وار ” -دئدي. قادين بو سؤزلردن شوبههلندي:
- گؤزللر گؤزه لي، منيم اوغلومون آدي ماهنوردور. سن اونا شاهنور نييه دئدين؟
قيز اولجه، هئچ نه دئمک ايستمه دي، آما يادينا سالاندا کي، شاه اونون هئچ بير سوالينا دوز-عمللي جاواب وئره بيلمه ييب، او دا شوبههلندي.
هر شئيي آنايا دانيشدي. آنا سو پريسي نين يانيندان چيخيب گئتدي شاهنورو آختارماغا. او چيخان کيمي شاهين آروادلاري اؤزلريني سوخدولار قيزين يانينا. اونون گؤز ياشلارينا محل قويمادان، غدارجاسينا اونون گؤزل ساچلاريني ديبيندن کسديلر. سونرا دا اونو هوشو گئدينجه يه قدر دؤيدولر. اؤزلري ده قهقهه ايله گولدولر کي، ايندي شاه اؤز گؤزلچه سيني تانيماياجاق.
آنا اَينينه کيشي پالتاري گئيينيب، بير خنجر گؤتوردو. دوز گئتدي وزيرين اوستونه. خنجري ديره دي وزیرين بؤيرونه کي، شاهنورون يئريني دئمهسن، بو ساعات بو قيلينجي سنين قارنينا سوخاجاغام. وزير جاني نين قورخوسوندان شاهنورون يئريني خانيما گؤستردي. شاهنورون آناسي اونو زينداندان خيلاص ائتدي و اؤزونو اوغلونا تانيتدي. شاهنور دوغما آناسيني تاپديغينا سئوينسه ده، باش وئرنلري ائشيتجک چوخ غمگين اولدو. آنا اوغلونو سارايدان چييخارتدي و گيزلي بير يئرده ساخلاييب، سو پريسيني اوغلو شاهنورلا قوووشدورماق اوچون سارايا تلسدي. آما او گئجيکميشدي. سو پريسي اوتاغيندا اوز-گؤزو قان ايچريسينده بيهوش حالدا اوزانميشدي. آنا قيزي بيرتهر اؤزونه گتيرنده پري اونا دئدي:
- مئهريبان آنا، آپار مني دنيز کنارينا، سال مني سويون ايچريسينه. اگر بير آز گئجيکسن، منيم گرک اؤلومو دنيزه آپاراسان.
آنا نؤکرلرين کؤمگي ايله سو پريسيني گتيردي دنيزه و سالدي سويون ايچريسينه. پري سويا گيرن کيمي آتاسي اونا وئرن باليققولاغيني اوفوردو. دنيز شاهينا بللي اولدو کي، اونون قيزي فلاکته دوشوب. اؤزونو تئز اونا چاتديردي.
او گوندن سو پريسي نين گؤزلليگي سولدو. اونون گوجو ده اولکي کيمي قالماميشدي. اينسانلاري سئون و هميشه اونلار اوچون گؤزلليک ياراتماغا چاليشان سو پريسي داها طبيعتين گؤزلليگينه فيکير وئره بيلميردي. دنيزين ديبينده هميشه يامياشيل اولان يوسونلار سارالدي، بؤيوک باليقلار کيچيک باليقلاري يئمهيه باشلادي، باليقچيلارين باليق توتماغينا هئچ کس مانع اولمادي. ياشيل دنيز دؤندو اولدو عادي دنيز.
همين گوندن شاهنور آديندا بختسيز بير جاوان بوتون گونو دنيزين قيراغيندا اوتوراراق سو پريسيني گؤزلهمهيه باشلادي.
آما اينسانلاردان کوسموش سو پريسي، داها هئچ واخت اونلارين يانينا قاييتمادي. او، دنيزين ديبينده کي سو يوسونلاري کيمي ساراليب-سولموشدو و هئچ واخت سويون ديبيندن سويون اوزونه قالخميردي.
دئييرلر، همين دنيزين قيراغيندا ديزي اوسته اوتورموش داشدان بير اوغلان وار. افسانه يه گؤره بو همين شاهنوردور کي، سويون قيراغيندا سو پريسيني گؤزلهيه-گؤزلهيه داشا دؤنوب
کؤچوروب حاضیرلایان: آلما یولو
(بو یازینین کؤچورمهسینده کؤچورن پروگرامیندان قوللانیلیبدیر )
اؤزگو متن
—–
زومار آیي ۴-ي, ۱۳۸۶ چاغ ۴:۰۰ آ.خ
[…] hbayat.azerblo… […]
زومار آیي ۲۰-ي, ۱۳۸۸ چاغ ۱:۴۴ گ.ؤ
ناغیلی اوخودوم، چوخ شیرین و سئویملی ناغیل دیر.
من موساعیده نیزله، بو داستانی cloob سیته سینده، قایناغینی قید ائدرک یایریام.
ساغولون