سون یازیلار

سون گؤروشلر

آرشیو


« اویانیش بایرامینیز قوتلو اولسون / آلما یولو | آنا یارپاق | ساوه ‌لی عاشیق رضاعلی / رحمتلی دوکتور علی کمالی »

گئرچک‌لیک گؤیچک‌لیک دیر! / دوکتور ایواز طاها

آغلارگولر ۱, ۱۳۸۶

طبیعت بایرامی یئره یئنی یاشیللیق گتیریبسه,

بیزده یاشیل دوشونمه‌یه باشلایا بیله‌ریک!

اینتئرنئت  دوشرگه‌لرینده [سابت‌لاریندا] قیزغین سالام‌لاشمالارا باخمایاراق، بیزده آغیر بیر دوشونجه خسته‌لییی وار: «بیزدن باشقا بیچیمده دوشونن‌لره قارشی دؤزومسوزلوک». ییغینجاق‌لاریمیزدا بئله [حتتا] باشقا سؤز ائشیتمک، یئنی دوشونجه اؤیرنمک ایسته‌میریک؛ اؤز اوره‌ییمیزین سسینی دینله‌مک، اؤز بئینیمزین عکس‌صداسینی آیری آیری آغیزلاردان ائشیتمک ایسته‌ییریک. بو بیر یاندان بیزی ساوادسیزلیغین یوورالاق جیزگی‌سیندن چیخماغا قویمور، او بیری یاندان ایسه «حقیقت» کیمی سئویملی آنلاییشی [مفهومو] قوربانلیق وئریر. بوردا گئرچک‌لیک قوربان کسیلیر، چونکو من تکجه اؤزومو، سؤزومو، و دوشونجه‌می گئرچک سانیرام.

میشل فوکونون باخیشینا گؤره، گئرچک‌لییی گوج قورولوشو یارادیر.دوغرودور بیر چوخ دوشونجه‌‌لری اونلارین یاراتدیقلاری سونوجدان آسیلی اولمایاراق آراشدیرمالیییق، آنجاق بوردا مئسله فرقله‌نیر. چونکو بو یانلیش دوشونوشون  [طرز تفکرون] سایه‌سینده، فوکونون و باشقا پست‌مدرنیست‌لرین ساووندوغو عدالت و اینسانلیق بوتونلوک‌له یئنیلیر. بو سؤز ایلک باخیشدا گوج قورولوش‌لاری‌نین تنقیدینه یؤنلسه ده، سون مقامدا آلین یازیمیزا بویون قویماغا گتیریب چیخاریر. سیز حقیقتین گوجلولر الینده اویونجاق اولدوغونا اینانیرسانیز, گوجون اؤزباشنالیغی قارشینداکی سون ییخیلماز سنگری اؤز الینیزله اوچورورسونوز.

حقیقتی آیاقلاماغا حاققیمیز چاتمیر. هر بیر «آزلیق»ین و «قدرت جیزگی‌سی دیشیندا [خاریجینده] یاشایان اینسان‌لار توپلوسو»نون بیر بیرجه داغ کیمی دایاغی وار: حقیقیت.  بو ایسه ان گؤیچک گئرچک‌لیک‌دیر

بؤلمه لر: گونده‌لیک یازیلار/ یادداشتها |

گؤروشلر