EYVAZ TAHA - ایواز طاها
RIZA HƏMRAZ رضا همراز
ƏLIMÜHƏMMƏD BƏYANI علی محمد بیانی
هادی قاراچای- HADI QARAÇAY
« مانقورت / چينگيز آيتماتوو | آنا یارپاق | “منه اؤیرهدین” یازیسی حاقدا مهران بهاری بهیین دوشونجهلری »
منه اؤیرهدین / سید حیدر بیات
بوز آیي ۱۲, ۱۳۸۵
اوشاقلیغیمدان تورکجه اوخویارام، سککیز یا دوققوز یاشیمدان سورهکلی تورکجهمیزی اوخوموشام، آمما دوغروسو یارپاق هفتهلییی چیخمامیشدان همیشه بیر بؤیوک بوشلوغو حیاتیمدا دویاردیم، تهراندا سعید موغانلی سوردو: یارپاغا نظرین نهدیر؟ دئدیم: یارپاق چیخاندان سونرا بیز دویونجاق تورکو اوخودوق.
تعارف ائتمهییردیم، یالاندا دئمهییردیم.
***
اون بئش ایلدن چوخدور کی تورکجه شعر یازیرام، و یئددی – سککیز ایلدیر کی دیلیمیزده نثر یازماغی تمرین ائدیرم. یازیلاریمی چوخلو سیتهلرده و ژورناللاردا گؤروبسوز حتمن.
***
بو ایللرده چوخلو تورکجه مقالهلری ده ائدیت ائتمیشم، یانی «پیام قم» هفتهلییینده تورکجه صحیفه آلیب تورکجه یازیلاری یاییملاماغا باشلایان گوندن. عؤمور نه قدر تئز سووشور، ائله بیل دوننایدی، آمما یوخ دؤرد ایل بوندان اؤنجه ایدی بلکه.
بوندان علاوه حتی بیر سیرا اونلو و بؤیوک یازارلاریمیزدا یازیلارینین ائدیتینی هردهن منه تاپشیرارلار.
***
یاهو مسینجیره گلنده بیر سیرا گنجلریمیز سوروشارلار: «بیزده سنین کیمی یازا بیلهریک بیر گون؟»
***
نئچه آیدیر قومدا بیر سیرا کیملییینه دوغرو قاییدان گنجلره تورکجهمیزین قیرامیرینی و یازیب اوخوماغینی اؤیرهدیریک.
***
سون و آجی ـ شیرین بؤلوم
ایکی هفته بوندان اؤنجه بیر یازی یازدیم، « آنادیلی، فئمینیزم، سینیرلار و بیر اؤنر» بونو چوخلو سیتهلر ده یوکلهدیلر، آمما یئنی سس سیتهسینده باخاندا بیر آز تعجب ائلهدیم. بو سیته بو باشلیغا بیر حرف علاوه ائتمیشدی. « آنادیلی، فئمینیزم، سینیرلار و بیر اؤنری».
اؤز یانیلماغیمی بیلدیم. دوغروسو تایپی یانلیش دئییلدی من «اؤنر» سؤزجویونو دوز بیلمیشدیم.
سونرا گونتای جاوانشیر بهیلریله دانیشدیقدا بیر ایلگینج مسئلهنی خاطیرلادیلار:
تورک دیلینده معمولا سؤزلرین کؤکو «امر» آنلامیندا ایشلهنیلر، مثلا «اؤلمک» سؤزونون کؤکو «اؤل» اولار، و «اؤنرمک» سؤزونون کؤکو «اؤنر».
و بونلارا بیر «و» یا «ی» آرتیردیقدا اسم دوزهلر: «اؤلو»، «اؤنری».
طبیعیدیر کی قورو و اؤزونو توتان بیریسی اولساایدیم بو سؤزلر منه چوخ آغیر گلهجهایدی، و نهایتده: «بیلیرم تایپدا یانلیش اولوب» دئیهجهایدیم.
آمما من یالنیز بونا اوزولدوم کی ایللر بویو اوخویوب، اؤیرهنیب، اؤیرهدیب، یازیب، یایاندان سونرا یئنهده تورکجهده بؤیوک و عفو اولماز یانلیشلیقلاریم وار و امنیتی مامورلارین سؤزونون یادینا دوشورم: کسی با شما کار نداره برین بخونین، بنویسین، کتاب چاپ کنین.
بیر دیلین اوخویوب یازماغینی اوخولسوز اؤیرنمک اولارمی؟
من بو اینسانی فاجیعهیه اوزولدوم. آمما بو تذکرلره چوخ سئویندیم، اؤزلجه یئنی سس سیتهسینین ایشی منی دویغولاندیردی. نه اولاردی بیزیم بوتون سیتهلریمیزده بئله بیر فرزانه اینسانلارین حضورو اولا ایدی.
بؤلمه لر: ادبیات |
بوز آیي ۱۲-ي, ۱۳۸۵ چاغ ۴:۴۴ گ.ؤ
سلاملار،
من سيزين «اؤنري» يئرينه «اؤنر» يازماغينيز فاجيعه دير، دوشونجه ده دئييلم. منجه يازماق هر نه دن اؤنملي دير. فاجيعه بودور كي ايرانين ۳۰ ميليون توركوندن، ۱۰-۱۵ دنه دوز عمللي وئبلاق يازان تاپيلمير!!
ساغ اولون