EYVAZ TAHA - ایواز طاها
RIZA HƏMRAZ رضا همراز
ƏLIMÜHƏMMƏD BƏYANI علی محمد بیانی
هادی قاراچای- HADI QARAÇAY
« پیام کویچیرو ماتسورا مدیر کل یونسکو به مناسبت روز جهانی زبان مادری | آنا یارپاق | غزلهاي ترکي حسين منزوي منتشر ميشود »
بو تایسیز حادیثه، بو حادیثه تایسیز / سید حیدر بیات
بوز آیي ۳, ۱۳۸۵
تئلفون زنگ آچیر، گئدیرم دستهیین سوراغینا، زنگاندا نئچهسی توتوقلانیب، حسین رحمتی، جلیل غنیلو و… سعیدین حیات یولداشی نئچه نفرین آدینی چکندهن سونرا سعیدینده آدینی چکیر، دوغروسو بو اؤزو بیر درس اولا بیلر، گرگین دوروملاردا اخلاقی رعایت ائتمک و روحیهنی ایتیرمهمک، زنگانین سازاق چالان یای آخشاملارینا فیکیرلشیرم، سعید ایله وداعلاشاندا آتاسی ایله قارداشی حیاطدا اولان آغاجین یانیندا دایانمیشدیلار، سانکی بیر شئی اکیردیلر یا دریردیلر بیلمهدیم، ایندی سعیدین قارداشیدا توتوقلانیب.
سعیدین حیات یولداشی آرتیریر: سعیدی چوخ چتین توتدولار، باجیلاری زادی اورداایدیلار، سعیدی آلمیشدیلار آرایا، سعیدین دوداقلاریدا قانامیشدی توتولاندا، ائله بیل اونو وورموشدولار…
***
دوغروسو بو هفته بیر دؤنه باشیما یامان بؤرک کئچیب، او گون قومدا آقای سلیمانی توتوقلاناندا گئجه هئی اؤز اؤزومه دئییردیم: سن بوردا راحات اوتوروبسان کیتابلارین و بیلگی سایارین یانیندا، و حیدر بابا منظومهسینین آمیر حیدری کیمی سماورین قایناییر[۱]، آمما آقای سلیمانی معلوم دئییل هاردا… و بو فیکیر ایله هئچ کابوسا یا یوخویا دالمام دا یادیمدا دئییل، آنجاق صاباح بیلدیم کی آقا یوسف سلیمانی گئجه ساعات اون بیرده ائوه قاییدیب و منه یالنیز …
نه ایسه بو گئجه بیلیرم باشیما بؤرک کئچمز، بیلیرم اونلار اینسانین یاریسی بوراخیلسا یاریسی بوراخیلمایاجاقدیر، آمما اؤرک ائویندن آرزی ائدیرم کی باشیما بؤرک کئچسین و بؤرک دئدیکده سعیدین تورک پاپاغی یادیما دوشور، تهراندا ستارخان مراسیمینده و او همیشه کی اوجادان گولمهلری، قهقههلری، و بیر شئی:
بیلیرسیز بعضی انسانلارین سسلری ایکی رگه اولار، انسان دئیهر ایکی سسی قاتیبسان بیری بیرینه و عینی زاماندا ایکی سیده دانیشیر، سعید ده ائله بیر شئی گؤرموشم من، آمما سسینده یوخ، بلکه دویغو و دوشونجهسینده، آذربایجان فعاللارینین ایچینده چئشیدلی سسلر واردیر و البته هئچ بیریسینده ده نئچه سسلی لییه بویون اَیمک یوخدور، آنجاق سعیدله دانیشاندا حتی تئلفوندادا بئله سعیدین اؤنجهده دویغوسو و ایستیقانلیلیغی قابارار سونرا اونون آردیجاق او یگانه فضیلت و منطیق و اخلاق و دوشونجه، نه بیلیم: بیلیم، علم و دوشونجه اوزره دانیشماق، بیلمیرم بونو آچیقلایا بیلمهییرم هر حالدا دئییه بیلهرم کی ائله بیل چن ایچینده بیر فیلسوفلا گؤروشورسن، بونو همیشه سئزمیشم.
***
داها سونرا، آنا دیلی گونو سووشدو، تورک شهرلرینده اولان بو اولای تایسیز دئییلایدی، آمما تایسیزایدی، خرداد دا خالق منیم دیلیم اؤلن دئییل دئسهلرده اونو یوروملایانلار وارایدی، هر نه کاریکاتور و توهین و عصبانیته یوروملانیردی، آمما بو دؤنه یالنیز دیل اوچون بئله موبارک حادیثه اوز وئردی. اینانین بیر بؤیوک و تایسیز حادیثه اوز وئریب، بو تایسیز حادیثه، بو حادیثه تایسیز.
***
و داها داها سونرا:
همیشه بیریسی توتوقلاناندا سعید اونا عایید بیر شئی یازاردی، ایندی ده…
البته بونون آنلامی بو دئییل کی یارین من توتوقلانسام سیزلرده منه…
سون سؤز:
منیم دیلیم اؤلن دئییل
اونوتدوم دئیهم: سعید متین پور، رضا عباسییا چوخ داریخمیشدی بلکه دوستاقدا بیربیرینی گؤروب دویونجا دانیشا بیلدیلر.
[۱] حیدر بابا آمیر حیدر نئینهییر
حتما یئنه سماوری قئینهییر
دای قوجالیب آلت انگینن چئینهییر…
شهریار
ــــــــــــ
http://www.hbayat.com
بؤلمه لر: ادبیات |
بوز آیي ۳-ي, ۱۳۸۵ چاغ ۱:۳۷ آ.خ
آمیر حیدر! یورولما سن و یورولماسین سعید لر کی یورولدوم من