سون یازیلار

سون گؤروشلر

آرشیو


« محرم در گچساران / وئبلاگ تانیتیمی | آنا یارپاق | قیچی هنوز باقی است. / سید حیدر بیات »

آنادیلی، فئمینیزم، سینیرلار و بیر اؤنر / سید حیدر بیات

دوندوران ۲۴, ۱۳۸۵

۱. رحمتلی پروفسور زهتابی‌نین «سن اوسان منده بویام» شعری ماراقلی بیر شعردیر، بعضی‌لری کیملیکلرینه دوغرو دؤنملرینین نده‌نینی بو شعر ذکر ائدیرلر. آمما بو شعرده اساسی بیر سوروندا واردیر. اودا اونون ایکینجی مصراع‌سی‌دیر: یوخو اؤیرتدی او اولده منه خواب کی یوخ. بو شعر آرتیق صابیرین طنز شعرینی اینسانا خاطیرلادیر:

لای لای بالا لای لای

یات قال دالا لای لای

بونون قارشی‌سیندا بختیار واهابزاده‌نین بو بئیتینی یازماق یئرسیز دئییل:

بالانا یئریمک اؤیره‌دینجه سن / اونا اؤیره‌دئیدین ییخیلماماغی

۲. بو شعر بیر باخیمدان دا ایلگینج‌دیر. دئمه‌لی بو شعر آرتیق زهتابی‌نین اوشاقلیق دؤورونه اویقون بیر شعردیر، او زامان کی آنالار اولده سو اؤیره‌دردیلر آب یوخ.

ایندی آنالار اسفلرله بعضی منطقه‌لرده آب اؤیره‌دیرلر سو یوخ.

۳. آنا دیلی مقوله‌سی ایسته‌ر ایسته‌مز بیر آز نئچه یؤنلو مسئله اولوبدور. دئمه‌لی کئچمیش زامانلاردا اوشاق یالنیز آناسی و یاخین اقربالاری و قونشولاریندان دیل اؤیره‌نردی و بو محیط‌ده اؤیرندی‌یی دیله فی‌المجموع آنا دیلی دئییله‌ردی، آمما ایندی جادو قوتوسو، و اوشاقلار باغچاسی و… بو رولو ایفاء ائدیرلر. اساسن آنا دیلی دئیه‌نده گئنیش بیر ساحه نظرده آلینمالی، آلینیر بلکه‌ده، نه ایسه…

۴. آنالار نه قدر اؤزگور یا باشقا تعبیریله سربست‌دیرلر، منظوروم اؤز آنادیل‌لرینی اوشاقلارینا اؤیرتمکدیر. بو مسئله ده آچیقلانمالی‌دیر. اساسن تکجه دیل اؤیرنمه اؤزگولویو یوخ، بلکه دیل اؤیرتمه اؤزگورلویوده ایراندا سورون آلتیندادیر. یانی دوروم آنالاری اؤز دیل‌لرینی اؤیرتمه‌مه‌یه دوغرو یؤنلدیر.

باشقا بیر تعبیریله دوغال آنا دیلی اوشاغا هئچ گلیب چاتماییر، بلکه آنا مجبور اولاراق اونو سانسور ائدیر. بلکه بو مسئله‌نی فئمینیزم و قادین‌لار حاققی چرچیوه‌سینده ده یئرلشدیرمک اولا و ها بئله اوشاقلار حاققی چرچیوه‌سینده.

۵.  دوغرودور کی سنیرلار ایندی پوزولوب و تبریزی فارسلاشدیرماغین یولو زنگان ایله مییانادان سووشماییر و هر صبح تهرانین بزکلی دوزکلی، مُجری خانیملاری شکر ازه ازه (شکر شکن) دوز اوتاغین یوخاری باشیندا تلوزیون ایچینده ایله‌شیب ومحمود افشار ایله محمد علی فروغی نین روحونو سئویندیریرلر. آمما یئنه جغرافیا مسئله‌سی اؤنملی‌دیر، بس لوطفن و لوطفن تهران، قوم، ساوه، همدان و زنگانین دوغو یؤنونون تورکلرینی اونوتمایین. فعالیتیمیزین چوخ پایینی سینیرلارا حصر ائتمه‌لی‌ییک.

۶. بیر اؤنریمده واردیر دیلداشلارا: گلین آنادیلی گونونده آیری دیلده دانیشیب یازمایاغین. گلین هر ایل بیر گون اؤز دیلیمیزده یازاق، و اؤز دیلیمیزده دانیشاق، قویون باشقا دیل‌لی‌لر بوگونده بیزیمله اؤز دیلیمیزده دانیشماق زوروندا قالسین‌لار. ان آزی اؤز سیته‌لریمیزده، ایمیل قوروپلاریندا، وئبلاگلاریمیزدا آیری دیلده یازمایاق.

——–

http://www.hbayat.com/

بؤلمه لر: خبر و تحلیل, گونده‌لیک یازیلار/ یادداشتها |

بیر گؤروش یازی: “آنادیلی، فئمینیزم، سینیرلار و بیر اؤنر / سید حیدر بیات”

  1. آنا دیلی و آنا دیلی گونو حاققیندا «آلما یولو»ندان باغلانتی توپلوسو « تورکوک بیز Türkük Biz دئییر:
    بوز آیي ۱-ي, ۱۳۸۶ چاغ ۹:۵۴ آ.خ

    […] آنادیلی، فئمینیزم، سینیرلار و بیر اؤنر / سید حیدر بیات […]

گؤروشلر